Մտավորականներն ակնկալում են, որ Արցախի Հանրապետության նախագահ Արայիկ Հարությունյանը կպաշտպանի Արցախի ժողովրդի և պետականության շահերը և չի խանգարի Արցախի նվիրյալ ուժերին՝ լուծելու երկրի առջև ծառացած կենսական խնդիրները, Azg.am-ի թղթակցի հետ զրույցում ասաց մշակութային գործիչ, մշակութաբան Սամվել Հարոյանը, ով, ի թիվս այլ մտավորականների, ստորագրել է նախօրեին Արայիկ Հարությունյանին հասցեգրված բաց նամակի ներքո։
«Սա ոչ միայն Արցախի, այլ նաև Հայաստանի ինքնության խնդիրն է։ Եթե տանը մեկի մատը ցավում է, բնական է՝ բոլորը պետք է անհանգստանան դրա համար։ Մենք ինչպե՞ս կարող ենք հիմա Արցախին անտեր թողնել։ Արայիկ Հարությունյանը պետք է նպաստի Արցախը փրկելու գործողություններին։ Եթե չի նպաստում, գոնե չխանգարի»,- նշեց մեր զրուցակիցը՝ հավելելով, որ ստեղծված իրավիճակում մտավորականները չեն կարող անհաղորդ մնալ և չմտահոգվել Արցախում առկա իրավիճակով։
Հիշեցնենք, որ ավելի վաղ մի խումբ մտավորականներ բաց նամակ էին հղել ԱՀ նախագահ Արայիկ Հարությունյանին՝ գրելով՝ հենց նա է գլխավոր պատասխանատուն, որ տարածքային և մարդկային աննախադեպ մեծ կորուստներից բացի՝ մսխվել է նաև այն տասնյակ հազարավոր հայորդիների արյան ու կյանքի գնով ձեռք բերված հաղթանակը։
«Մենք ընդամենը փաստ ենք արձանագրում, ներկայացնում ենք իրողությունը։ Ուզում ենք հիշեցնել նաև, որ անկախ նրանից, Դուք ցանկանում եք թե ոչ, հաճելի է Ձեզ թե ոչ, մարդիկ, հանրությունը, ժողովուրդը ի դեմս Ձեզ տեսնում է կորցրած զավակների, կորսված օջախների, իր դժբախտությունների և ողբերգությունների գլխավոր մեղավորին»,- ասված է բաց նամակի տեքստում։
