Օգոստոսի 6-ից սոցցանցերում տեղեկություն է տարածվել, որ Վանաձորից Երևան են բերել հաշմանդամություն ունեցող երեխաների, որպեսզի նրանք ժամանակ անց կացնեն «Ջրաշխարհում»։ Այնուհետև բողոք է հնչել, թե երեխաներին ուղեկցողներին «Ջրաշխարհից» պատասխանել են, թե չեն կարող ընդունել նրանց, որովհետև «երեխաները կխանգարեն իրենց մյուս այցելուներին»։
Սոցցանցերում բարձրացված աղմուկից հետո «Ջրաշխարհի» ֆեյսբուքյան էջում տեղադրվել է այս հայտարարությունը՝ լուսանկարի վրա սլաքներով ցույց տալով, թե ովքեր են իրենց դիմել։
Մարդու իրավունքների պաշտպան Անահիտ Մանասյանն արձագանքել է հաշմանդամություն ունեցող երեխաների մուտքը «Ջրաշխարհ» խոչնդոտելու միջադեպին. հայտնում են ՀՀ ՄԻՊ գրասենյակից։
«Օգոստոսի 6-ին, սոցցանցերում տեղեկություն է տարածվել, որ Վանաձորից Երևան ժամանած հաշմանդամություն ունեցող մի խումբ երեխաների մուտքը «Ջրաշխարհ» ժամանցի կենտրոն առանց հիմնավորման արգելվել է: Պաշտպանն աշխատակազմին անմիջապես հանձնարարել է զբաղվել վերոնշյալ խնդրով: Իրականացվում են անհրաժեշտ միջոցառումներ ստեղծված իրավիճակի պատճառները պարզելու համար:
Մարդու իրավունքների պաշտպանը խիստ կարևորում է հաշմանդամություն ունեցող անձանց նկատմամբ ցանկացած խտրական վերաբերմունքի բացառումն ու հասարակության բոլոր անդամների համար հավասար հնարավորությունների ապահովումը:
Սույն դեպքը գտնվում է Պաշտպանի անմիջական ուշադրության ներքո: Մանրամասների վերաբերյալ աշխատակազմը հանդես կգա լրացուցիչ հաղորդագրությամբ», – ասված է ՄԻՊ-ի հայտարարության մեջ:
