Իրավապահ մարմինները գրեթե երկու ամիս ժամանակ ունեին՝ ընթացք տալու 16-ամյա պատանուն ծեծի ենթարկելու գործին և պատժելու անչափահասին ծեծի ենթարկած Դիլիջանի բաժնի քրեական հետախուզության բաժանմունքի պետ Արսեն Ղայթմազյանին։ Եվ եթե չլիներ հանրային ճնշումը, գրեթե վստահ եմ, որ այդ գործն այդպես էլ կարճվելու էր, քրեական հետապնդումը՝ դադարեցվելու, իսկ քրեականի պետն էլ շարունակելու էր պաշտոնավարել։ Azg.am-ի թղթակցի հետ զրույցում այս մասին ասաց իրավապաշտպան Զարուհի Հովհաննիսյանը։
«Իրականում մեր երկրում բռնության հանդեպ բավական հանդուրժողական վերաբերմունք կա։ Բազմաթիվ են դեպքերը, երբ իրավապահ համակարգի աշխատակիցները կարող են բռնություն կիրառել քաղաքացու նկատմամբ։ Վերջին շրջանում բավական շատ են դեպքերը, երբ բերման ենթարկվելիս կամ պարզապես ցուցմունք տալիս մարդիկ ոստիկանության բաժանմունքում խոշտանգվում են։
Ցավոք սրտի, համակարգը բավարար ջանք չի գործադրում բռնության մշակույթն արմատախիլ անելու ուղղությամբ»,- ասաց իրավապաշտպանը։
Զարուհի Հովհաննիսյանը միաժամանակ հավելեց՝ անչափահասին ծեծի ենթարկած Արսեն Ղայթմազյանի գործով պետք է հանրային ճնշման գործադրվի և այդ ճնշման ներքո պետք է հասնել արդար դատաքննության։
«Հանրության ուշադրությունը պետք է շարունակական լինի, և հասարակությունը պետք է հաշվետվողականություն պահանջի իրավապահ համակարգից՝ ինչ է արվել քննությունը մինչև վերջ տանելու և որոշում կայացնելու ուղղությամբ»,- ամփոփեց մեր զրուցակիցը։
Հիշեցնենք, որ Դիլիջանի բաժնի քրեական հետախուզության բաժանմունքի պետ Արսեն Ղայթմազյանը 2 ամսով կալանավորվել է. դատարանը բավարարել է նախաքննական մարմնի միջնորդությունը:
Նրան մեղադրանք էր ներկայացվել Քրեական օրենսգրքի 196-րդ հոդվածի 2-րդ մասի 3-րդ կետով (անչափահասին ֆիզիկական ուժեղ ցավ կամ հոգեկան ուժեղ տառապանք պատճառելը):
