Մեկ անգամ չէ, որ իմ դիրքորոշումն եմ հայտնել Մարդու իրավունքների պաշտպանի պաշտոնը ներկայումս զբաղեցնող անձի մասին. ես համարում եմ, որ այդ անձն իր տեղում չէ, ես համարում եմ, որ նա մարդու իրավունքների պաշտպանի գործառույթին ընդհանրապես հարմար չի եղել և հարմար չէ , Azg.am-ի թղթակցի հետ զրույցում ասաց իրավապաշտպան Ռուբեն Մելիքյանը՝ անդրադառնալով ՄԻՊ Անահիտ Մանասյանի՝ լրագրողների ներկայությամբ Բագրատ սրբազանին հանդիպելու մերժմանը։
Նրա խոսքով՝ Անահիտ Մանասյանը մարդ է, որը Մարդու իրավունքների պաշտպան է դարձել բացառապես իշխող կուսակցության ձայներով։
«Բացառապես իշխող կուսակցության ձայներով կարելի է դառնալ Կենտրոնական բանկի խորհրդի անդամ, բայց ոչ՝ Մարդու իրավունքների պաշտպան՝ այն էլ այն օրը, երբ նրա ներկայությամբ իշխող ուժի պատգամավորները մյուս թեկնածուի՝ ականջ կտրելու և այլնի մասին արտահայտություններ էին անում։
Առաջին իսկ օրից մենք Մարդու իրավունքների պաշտպանի պաշտոնը զբաղեցնող անձ ունենք, այլ ոչ թե Մարդու իրավունքների պաշտպան՝ առավել ևս, որ նա, իմ կարծիքով, հասարակության շրջանում բարձր հեղինակության չափանիշից շատ հեռու է»,- ասաց Ռուբեն Մելիքյանը։
Անդրադառնալով Անահիտ Մանասյանի ծավալած բուն գործունեությանը՝ իրավապաշտպանը նկատեց՝ դրա արդյունքում ոչ միայն որոշ կասկածներ չեն փարատվել, այլ հակառակը՝ ավելացել են։
«Ինչպե՞ս կարող է Մարդու իրավունքների պաշտպանն այս իրավիճակում հրաժարվել թափանցիկությունից և հրապարակայնությունից։ Դա առնվազն անհասկանալի է։
Ինքս, ի դեպ ասեմ, չեմ եղել ակցիայի վայրում, որովհետև անձամբ առհասարակ չեմ ցանկացել այդ «դուռը» գնալ։ Սա թող դիտարկվի որպես իմ վերաբերմունքն այդ պաշտոնը զբաղեցնողի նկատմամբ։ Սակայն ուզում եմ հատուկ ընդգծել, որ իմ վերաբերմունքը վերաբերում է բացառապես ՄԻՊ պաշտոնը զբաղեցնող անձին և չի ընդգրկում ՄԻՊ աշխատակազմը. ես աշխատակազմում ճանաչում եմ բազմաթիվ պրոֆեսիոնալ, նվիրված մարդկանց, որոնց շնորհիվ այդ պաշտոնն զբաղեցնող անձը կարողանում է որոշակի արդյուքններ ցույց տալ՝ իհարկե երկրորդական հարցերում»,- ամփոփեց Ռուբեն մելիքյանը։
Հիշեցնենք, որ ՀՀ մարդու իրավունքների պաշտպան Անահիտ Մանասյանն այսօր հրաժարվել էր լրագրողների ներկայությամբ ընդունել Բագրատ Սրբազանին, սակայն հայտնել էր, որ իր առաջարկը մնում է ուժի մեջ, և ինքը պատրաստ է առանց լրագրողների ընդունել նրան և ևս 4 անձի։
«Տավուշը հանուն հայրենիքի շարժման» առաջնորդ Բագրատ սրբազանը շարժման մասնակիցների հետ այսօր շարժվել էր դեպի ՄԻՊ գրասենյակ։ Տավուշի թեմի առաջնորդը հայտարարել էր, որ իրենք այցելել են Մարդու իրավունքների պաշտպանի գրասենյակ, որպեսզի իրենց հարցերին պատասխան տան ու նաև ասեն՝ այս ողջ ընթացքում ՄԻՊ-ը ծառայել է մարդու իրավունքների՞ն, թե այլ բանի։
Ավելի վաղ Բագրատ սրբազանը նշել էր, որ առնվազն մի քանի լրատվամիջոց պետք է ներկա լինի հանդիպմանը, որպեսզի ամեն ինչ թափանցիկ լինի, հակառակ դեպքում հանդիպումը չի կայանա։
