Այսօր հրավիրված քննարկման ժամանակ արցախցի փաստաբան Ռոման Երիցյանը մանրամասներ ներկայացրեց ավտոմեքենան արգելված վայրում կայանելու համար եղբորը՝ Արամ Երիցյանին ոստիկանության աշխատակիցների կողմից դաժան ծեծի ենթարկելու
և տարբեր կոտրվածքներով ոստիկանության բաժանմունք տեղափոխելու դեպքի առնչությամբ։
Ըստ այդմ՝ Արամ Երիցյանը մեքենան կայանել է չթույլատրված վայրում, ինչից հետո պարեկները նրան փորձել են ենթարկել վարչական պատասխանատվության։ Երիցյանը տեղեկացրել է, որ մեքենան ինքը չի վարել։
«Արդյունքում պարեկները փորձել են խուզարկել եղբորս, այնուհետև նկատելով, որ իրավաչափորեն չեն կարողանում նրան խուզարկել, սկսել են կասկածել, որ եղբայրս ալկոհոլ է օգտագործել, որ նրա մոտ կտրող-ծակող գործիք, թմրանյութ կա։ Պահանջել են իրենց հետ ներկայանալ ոստիկանության բաժին, ինչին եղբայրս համաձայնել է։
Սակայն պարեկները փորձել են կիրառել ձեռնաշղթա, ինչին եղբայրս, բնականաբար, չի համաձայնել։ Արդյունքում նրա նկատմամբ կիրառվել է բռնություն և արդեն գետնին ընկած վիճակում շատ մոտ տարածությունից երկու անգամ աչքերին արցունքաբեր գազ են կիրառել։ Դրանից հետո ձեռնաշղթաներով տեղափոխել են ոստիկանություն։
Բռնության հիմնական գործողությունները տեղի են ունեցել հենց այնտեղ։ Եղբորս առաջինից երկրորդ հարկ բարձրացրել են քարշ տալով։ Այդ ընթացքում հայհոյանքներ են հնչել ոչ միայն նրա, այլև արցախցիների հասցեին»,- պատմեց Ռոման Երիցյանը։
Նրա ներկայացմամբ՝ ոստիկանությունում 4 ժամ պահվելուց հետո Արամ Երիցյանը տեղափոխվել է ՁՊՎ, այնուհետև դատարան միջնորդություն է ներկայացվել վերջինիս կալանավորելու վերաբերյալ։
«Դատարանը ոչ միայն մերժել է կալանավորման միջնորդությունը, այլև ձերբակալությունը որակել է ոչ իրավաչափ։ Անտեսելով այս ամենը՝ Քննչական կոմիտեն երեկ կրկին միջնորդություն է ներկայացրել դատարան Արամ Երիցյանին կալանավորելու վերաբերյալ։ Դատավոր Մարտին Արզումանյանը 20։15 դատական նիստը սկսել է և արդեն 23։00-ի սահմաններում հրապարակել դատական ակտը, որի համաձայն քննիչի միջնորդությունը վերստին մերժվել է։
Այսպիսիով, փորձ է արվում ամեն գնով հասնել նրան, որ եղբայրս գտնվի անազատության մեջ։ Երեկ նա 24 ժամով կրկին ապօրինի հայտնվեց անազատության մեջ»,- ասաց փաստաբանը։
Հարցին՝ իր կարծիքով ո՞րն է նման գործողությունների պատճառը, Ռոման Երիցյանը պատասխանեց՝ կարող է լինել մի քանի պատճառ՝ հանրությանը վախի մթնոլորտում պահելը, անձամբ իր փաստաբանական գործունեությունը, ինչպես նաև պարեկներին ցուցաբերած վերաբերմունքը։
«Ես պարեկների գործունեությունն արժանացնում եմ շատ կոշտ քննադատության, ինչի պատասխանն էլ ստացել եմ ոչ թե ես, այլ եղբայրս»,- ասաց Ռոման Երիցյանը։
Անդրադառնալով ՆԳ նախարարության տարածած պարզաբանմանը, որ Արամ Երիցյանը ոչ թե ծեծի է ենթարկվել, այլ ձերբակալման ընթացքում ինքն է հարվածներ հասցրել և դիմադրություն ցույց տվել պարեկներին, Ռոման Երիցյանը հիշեցրեց՝ ինքը դեպքը ներկաայցնող տեսագրություն է հրապարակել, որտեղ եղբոր նկատմամբ բռնություն, ձեռնաշղթաներ և արցունքաբեր գազ է կիրառվել։
«ՆԳ նախարարությունն այդ հայտարարությունը տարածելու փոխարեն լավ կաներ ամբողջությամբ հրապարակեր տուժող ճանաչված պարեկի տեսաձայնագրությունը։ Երբ քննիչը նրան հարցնում է՝ տեսաձայնագրող սարքը միացվա՞ծ է եղել, պարեկը պատասխանում է՝ այո՛։ Նա նաև ասում է, որ կարող է տրամադրել տեսանյութը։ Սակայն քննիչի՝ այդ սարքն առգրավելու որոշմանն ի պատասխան՝ պարեկային ծառայությունից գրություն է ստացվում, որ տեսաձայնագրող սարքը ոչինչ չի արձանագրել, այսինքն՝ եղել է անջատված վիճակում», ասաց Ռոման Երիցյանը՝ կրկին հորդորելով հրապարակել տեսաձայնագրությունը։
