Այս տարի, նախորդ տարիների համեմատ, նախաամանորյա թանկացումների պատկերը մի փոքր տարբեր կլինի. պատճառն այն է, որ ամբողջ տարվա ընթացքում գնաճն աննախադեպ է եղել, Azg.am-ի թղթակցի հետ զրույցում ասաց «Իրազեկ և պաշտպանված սպառող» ՀԿ նախագահ Բաբկեն Պիպոյանը։
Նրա խոսքով՝ աննախադեպ գնաճի պայմաններում թանկացումները տոնական օրերին տոկոսային առումով տարբերվում են այն տարիներից, երբ գնաճն այդքան էլ բարձր տոկոս չի կազմել։
«Իսկ ահա առաջարկ-պահանջարկով պայմանավորված գնաճի փուլը կսկսվի դեկտեմբերի 15-ից հետո։
Մեր դիտարկումները ցույց են տալիս, որ գնաճն այս պահին մոտ է տարվա ընթացքում պահպանված պատկերին կամ շատ քիչ է տարբերվում։ Այնպես չէ, որ նախորդող ամիսներին գնանկում ենք ունեցել, հակառակն՝ ամեն հաջորդ ամիս, նախորդի համեմատ, գնաճ ենք ունեցել, այսինքն՝ գնաճային ֆոնը մեր կյանքում պահպանվել է։ Հիմա մենք պետք է այս նոր գնաճը դիտարկենք այս համատեքստում»,- ասաց Բաբկեն Պիպոյանը։
Դեկտեմբերի 15-ից հետո, ըստ մեր զրուցակցի, պետք է սպասել հատկապես մսեղենի, գյուղմթերքի և տոնական սեղանին բնորոշ որոշ ապրանքակտեսակների գների բարձրացման։
«Օրինակ՝ հայտնի է, որ Ամանորին ընդառաջ՝ խոզի ազդրամսի գինն ավելանում է, բայց պետք է դիտարկենք՝ ընդհանուր խոզի մսի միջին գինը փոխվո՞ւմ է, թե ոչ, որովհետև մսավաճառներն, օրինակ, այդ օրերին սկսում են խոզի թիակն ավելի դժվար վաճառել, և ստիպված՝ այդ հատվածի մսի գինն էժանացնում են։
Այսինքն՝ խոզի մսի գինը պետք է ֆիքսել ոչ թե ընդամենն ազդրամսի արժեքով, այլ՝ ընդհանուր վերցրած՝ հասկանալով՝ արդյոք խոզի մսի մթերման գինը փոխվում է, թե ոչ»,- պարզաբանեց Պիպոյանը։
«Իրազեկ և պաշտպանված սպառող» ՀԿ նախագահը միաժամանակ դժվարացավ կոնկրետ թիվ նշել՝ այս տարի՝ առկա գնաճի պայամններում, որքան կարժենա ամանորյա սեղանը միջին վիճակագրական հայ ընտանիքի համար։
Պատճառն, ըստ նրա, այն է, որ «միջին վիճակագրական» ասվածը խիստ հարաբերական է։
«Հայ ընտանիքների միջին ինդեքսը 3.5 է։ Նման ընտանիքները, պայմանական վերցրած, տոնական օրերին կարող են ունենալ մինչև 10 հյուր, մինչդեռ 6-7 հոգուց բաղկացած ընտանիքները՝ ընդհուպ 20-30 հյուր, երբեմն՝ ավելի շատ։ Հասկանալի է, որ այդ ընտանիքների ամանորյա ծախսերն էականորեն տարբերվելու են միմյանցից։ Ինչո՞ւ. որովհետև այն սնունդը, որն ամեն օր օգտագործում են տարբեր թվով անդամներ ունեցող ընտանիքներում, արդեն իսկ գների մեջ 2 անգամ տարբեր է։ Պայմանական՝ մի ընտանիքում խոզի միս գնում են 3, մյուսում՝ 7 հոգու հաշվարկով։
Ինչ վերաբերում է հյուրերին, նույն այդ ընտանիքներում գնումները համապատասխանաբար տարբերվելու են 3 անգամ։ Ահա այս պատճառով էլ միջինացված թիվ անհնար է նշել։ Մենք պետք է հասկանանք, որ միջին գին ուղղակի չկա»,- ասաց Բաբկեն Պիպոյանը։
