Ես շատ նեղացած եմ, իմ մասին զրպարտություն է ասվել. ԵՊՀ-ի դիմաց հավաքված «Տավուշը հանուն Հայրենիքի» շարժման մասնակիցներին ասաց ԵՊՀ ուսումնական գծով պրոռեկտոր Էլինա Ասրիյանը։
Նշենք, որ երեկ Բագրատ Սրբազանն ընթերցել էր մամուլում հրապարակված տեղեկությունը, թե պրոռեկտորը հավաքել է ԵՊՀ դեկաններին ու հրահանգել հետևել, որ ուսանողները դասադուլի չմասնակցեն, չբացակայեն դասերից։
Պետք լինի, 1000 ուսանողի էլ կհեռացնեմ. մամուլում հրապարակվել էր Ասրիյանի հայտարարությունը, որի վերաբերյալ նա այսօր ասաց, որ նման բան չի եղել, ինքը այդպիսի հայտարարություն չի արել։
Երբ Սրբազանն ասաց, որ ինքն ասել է, որ դրան չի հավատում, Ասրիյանը պատասխանեց. «Էդ դեպքում դուք պետք է չասեիք այն, ինչին չեք հավատում»:
Սրբազանը պարզաբանեց. «Երբ երեկ գիշեր տեղեկությունն ինձ բերել են, ես այն ընթերցել եմ եւ ասել եմ, որ հավաստի տեղեկություն չի սա, բայց ես իրավունք չունեմ չճշտելու: Ասել եմ, եթե սա ճիշտ է, ապա դատապարտելի է, եթե սա սխալ է, ես ներողություն եմ խնդրում»:
Ասրիյանն ասաց, որ ԵՊՀ-ն ուսանողակենտրոն կառույց է ու այնտեղ յուրաքանչյուր ուսանողի իրավունքը պաշտպանված է։
Բագրատ Սրբազանն արձագանքեց. «Եթե որեւէ նշույլ անգամ զգացվել է իմ խոսքի մեջ տվյալ տեղեկության հանդեպ, որը ամենահեռավոր աստիճանով ազդել կամ վիրավորել է, ես ներողություն եմ խնդրում: Մենք եկել ենք տեղեկությունը ստուգելու: Ճիշտ քայլ ենք արել՝ առանց մարդկանց թիրախավորելու եւ արատավորելու»։
Մանրամասները՝ տեսանյութում.
