Արագածոտնի թեմի առաջնորդանիստ Սուրբ Մեսրոպ մաշտոց եկեղեցում հոկտեմբերի 30-ի երեկոյան կատարվեց միասնական ժամերգություն և աղոթք։
Օշական էին եկել Արագածոտնի թեմի տարբեր եկեղեցիներում ծառայող հոգևորականներ՝ մասնակցելու միասնական ժամերգությանն ու աղոթքին։
Արագածոտնի թեմի առաջնորդ Տեր Մկրտիչ եպիսկոպոս Պռոշյանը 2 ամսով կալանավորված է, բայց հոգևորականները հետևում են, որպեսզի մարզի հոգևոր կյանքն ընթանա բնական հունով։ Հովհաննավանքը, սակայն, բռնազավթված է։ Ստյոպա Ասատրյանը եկեղեցու կողպեքը փոխել է, օծյալ քահանաներ Տեր Սարգսին ու Տեր Մանուկին թույլ չի տալիս մտնել Հոհաննավանք՝ իրականացնելու հոգևոր ծառայությունը։
Ստյոպայի ոտնձգություններն իրականացվում են իշխանությունների հովանավորությամբ։ Ստյոպան շրջում է իր անվտանգությունն ապահովող անձանցով։ Ոստիկանները հսկում են Օհանավանն ու հատկապես Հովհաննավանքն ու հարակից տարածքը։
Սուրբ Մեսրոպ Մաշտոց եկեղեցում ժամերգությանը մասնակցում էր նաև Հովհաննավանքի հոգևոր հովիվ Տեր Սարգիս քահանա Սարգսյանը, որի հոգևոր ծառայությունը խաթարված է։ Խաթարված է նաև հավատացյալների՝ օծյալ քահանայի մատուցած պատարագին, եկեղեցական արարողություններին մասնակցելու իրավունքը։
«Լիահույս ենք, որ այս ամենը ավարտվելու է, և Հովհաննավանքը սրբագործվելուց հետո, մենք` ես և իմ հոգևոր եղբայր Մանուկը, կանցնենք հոգևոր մեր ծառայությանը։ Իրենք անցած կիրակի ցույց տվեցին, որ այն, ինչ հայտարարել էին, փուչ է, և իրենք արդեն պարտվել են»,–Օշականում, լրագրողների հետ զրույցին ասաց Տեր Սարգիսը։
Մանրամասները՝ տեսանյութում։
