Ես ոչ կտտանքներից եմ վախենում, որ կալանքներից, ոչ էլ նույնիսկ մահվանից: Այս մասին այսօր՝ հունիսի 19-ին, մամուլի ասուլիսի ժամանակ նշեց Բագրատ սրբազանը՝ անդրադառնալով նրան, որ իր դեմ որոշակի նյութեր են հավաքվում, փորձում են ապացույցներ գտնել, որ բարեգործության անգամ տակ այլ գործունեություն է ծավալել:
«Այո, ինձ տեղեկություններ հասել են, որ տարբեր ուսումնասիրություններ են անում, նույնիսկ գնացել են 15 տարվա հաշիվներ քննելու:
Գետահովիտում մենք մեծ, ամբողջությամբ ավերված տարածք ունենք, 2020-ին նախաձեռնել ենք քաղցկեղով հիվանդ երեխաների հոգեւոր վերականգնողական կենտրոն կառուցելը: Գումարները տրվել են, կենտրոնը կառուցված է: Կենտրոնի բացումը եղել է արյունաբանական ինստիտուտի այն ժամանակվա գլխավոր բժիշկ Սամվել Դանիելյանի մասնակցությամբ:
Ինչ մնում է գումարներին, շատ մանրամասներ հայտնել, որովհետեւ եթե իրենք սկսում են այս գործընթացը, չափազանց մեծ անակնկալների եւ ներողություն խնդրելու կոչված կլինեն: 660 հազար եվրո է փոխանցվել: Շինարարությունը մոտ 4 հազար քմ է: Երկու շենք է, երրորդն կցորդ շենքը մենք ենք ավելացրել: Մենք ոչ միայն չենք մսխել, այլ դեռ ստիպված ենք եղել մի քանի հարյուր հազար ավելացնել այդ գւմարի վրա, որ կարողանանք այդ ամբողջ շինարարությունն ավարտել:
Սարսափելի վնասներ ենք կրել, որովհետեւ այդ ժամանակ տարադրամի կտրուկ փոփոխություն է տեղի ունեցել: Մենք մոտ 20 տոկոս վնաս ենք կրել միայն այդ պատճառով: Կենտրոնը անվճար է, վճարովի չէ: Լավ կլինի, որ ուսումնասիրեն ու ամաչեն: Եթե շնորհակալության թուղթ էլ պատրաստեն, ձեզ ցույց կտամ»,-ասաց Բագրատ սրբազանը:
Անդրադառնալով Մարտի 1-ի թեմային՝ Տավուշի թեմի առաջնորդը նկատեց.
«Մարտի 1-ը ողբերգություն է բոլոր առումներով։ Մարտի 1-ը բացահայտելու լիարժեք հնարավորություն ուներ այս իշխանությունը վեց տարվա ընթացքում, հետևաբար, երբ իրենք կբացահայտեն, գնահատական կտան, ես էլ ինձ իրավունք կվերապահեմ գնահատական տալու»,- ասաց նա՝ պատասխանելով հարցին, թե ինչո՞ւ ժամանակին գնահատկան չի հնչեցրել Մարտի 1-ի վերաբերյալ, երբ հիմա հունիսի 12-ի իրադարձությունները համեմատում է այդ օրվա հետ։
Բագրատ Սրբազանի խոսքով՝ Մարտի 1-ի հետ համամետությունը կապված է եղել զուտ անձով։
«Այդ մարդն ի՞նչ էր ասում Մարտի 1-ին՝ հոգին փառավորվում էր, քաղաքացիներին հրահրում էր, որ ոստիկաններին ջարդեն, երկաթներ վերցնեն, ինքնպաշտպանվեն։ Ես համեմատել եմ այդ դրվագները»,- նշեց նա։
Սրբազանն ասաց, թե ինքն այն մարդը չէ, որ Մարտի 1-ի քաղաքական գնահատական տա։
«Դատարան կա, վեց տարի դատարանն իրենց ձեռքում է, բոլոր հնարավոր տարբերակներով՝ ԱԱԾ, փաստաթղթեր, ամեն ինչ իրենց ձեռքում է, թող բացահայտեն»,- նշեց Բագրատ Սրբազանը։
Նա ասաց, որ Մարտի 1-ը Հայաստանի պատմության ամենասև էջերից մեկն է։
