Փետրվարի 24-ին, Մայր Աթոռ Սուրբ Էջմիածնում լարված մթնոլորտ է տիրել, որովհետև ամեն վայրկյան կարելի էր սպասել դավադիր ոտնձգությունների, այլապես դեռ փետրվարի 23-ից այնտեղ մարդիկ չէին հերթապահի։
Ընդդիմությունն այսօր Էջմիածնում էր։ Այնտեղ էին նաև սրտացավ ու մտահոգ մարդիկ, որոնք պաշտպանում են հայ եկեղեցին սեփական իշխանությունից։ Սեփականն, իհարկե, հարաբերականորեն ենք ասում, որովհետև եկեղեցու կողքին կանգնած հանրությունը հաստատ այսօրվա իշխանություններին իրենը չի համարում։ Այստեղ էլ է անջրպետ առաջացել։
Հասել ենք մի կետի, երբ հայ մարդն իր կրոնը, եկեղեցին, հավատը, կաթողիկոսին ստիպված է պաշտպանել երկիրը կառավարողներից ու նրանց կողմից ուղղորդվածներից, նրանց «պրոյեկտներից»։
Իսկ այդ «պրոյեկտները» փորձում են քայքայիչ գործողություններ իրականացնել, սադրել, ոտնձգություններ անել, բողոքի ակցիաներ կազմակերպել հայ եկեղեցու և հայոց կաթողիկոսի դեմ։
Իշխանությունները թիրախավորել են մեր ազգային արժեքները՝ կրթությունը, մեր հերոսներին, մեր պատմությունը, եկեղեցին, զինանշանը՝ այն ամենը, ինչը թշնամաբար է ընդունում մեր թշնամին։
