Azg.am-ը ներկայացնում է Արցախի մեր գործընկերների պատրաստած տեսանյութը։
Խոսրովյանների բազվազավակ ընտանիքի կրտսեր անդամն է 8 օրական Էմիլը։ 9-րդ զավակին լույս աշխարհ բերած երիտասարդ մայրիկի հիմնական մտահոգություններն այս օրերին փոքրիկի հետ են կապված։ Շրջափակված Արցախում մանկական կերի ու տակդիրների պակասը զգալի է։
Նախքան 9-րդ բալիկի լույս աշխարհ գալը, Արևիկը երեխաներից՝ Ռոբերտի և Սվետայի հետ մի քանի օրով տեղափոխվեց Ստեփանակերտ՝ մայրիկի մոտ։ Ճարտարում ամուսնու հետ մնացին մյուս 6 բալիկները։ Վառելիքի պատճառով Արևիկի ամուսինն անգամ բալիկին ծննդատնից դուրս գրելու օրը չկարողացավ Ճարտարից Ստեփանակերտ հասնել։
Օկուպացված Քաշաթաղից Հայաստանի Հանրապետություն, վերջում` Արցախի Ճարտար քաղաք՝ նորից Քաշաթաղ վերադառնալու մեծ հույսով:
Խոսրովյանների բազմազավակ ընտանիքի անցած դժվարին ճանապարհն ` 2020թ․ պատերազմից հետո։ Հայաստանում մնալ չցանկացան։ Մեկ տարին բավական էր` հասկանալու, որ աշխարհում ամենալավ տեղn Արցախն է։
Քաշաթաղի շրջանի Հերիկ գյուղ Խոսրովյանների ընտանիքը 4 զավակի հետ տեղափոխվել էր Շուշիից։ 4 զավակներն էլ Հերիկում ծնվեցին։ Գյուղում ունեցած 2 տնից ընտանիքը գրեթե ոչինչ հանել չկարողացավ։
Մարտունու շրջանի Ճարտար քաղաքում պետության կողմից առանձնատուն են ստացել։ Մեծ ընտանիքին անգամ երկհարկ տունը չի բավարարում։ Ընտանիքի կարիքները հոգալու համար ամուսինը հողամաս է մշակում: Օգնում է նաեւ երեխաների նպաստը։
8 օրական Էմիլի համար խնամքի միջոցներ, անգամ մանկական մահճակալ չեն կարողացել գնել։
Հյուրերին զինվորական հագուստով է դիմավորում և ճանապարհում Արցախի հերոս Ռոբերտ Աբաջյանի անունը կրող 5 տարեկան Ռոբերտը։ Փոքրիկ Էմիլն էլ Արցախյան 3-րդ պատերազմում զոհված հորեղբոր անունն է կրում։ Շրջափակման 53-րդ օրը Արցախում Արցախի լինելն ու հարատևությունը խորհրդանշող մանուկներ են ծնվում։
