Փաշինյանն ուզում է ինձ կյանքից զրկել. Ղուկասյան

Ես չէի կարող քաղաքական հայտարարություն չանել, որովհետև Ազգային ժողովում թիվ մեկ ամբիոնից ՀՀ վարչապետի խոսքն է հնչում, թե հանրային և քաղաքական դաշտից պետք է Գյումրիի քաղաքապետին դուրս շպրտել, և ընդհուպ «Վարդանիկ» բառն է օգտագործում։ Այս մասին լրագրողների հետ զրույցում հայտարարել է Գյումրիի քաղաքապետ Վարդան Ղուկասյանը։

«Ճիշտ ասած մենք դրան սպասում էինք և սպասում ենք այլ–այլ բաներին։ Անգամ գաղութները հանրային դաշտի մեջ են մտնում, քաղաքականությունից դուրս շպրտելը հասկացանք, իրավունք չունեն, բայց խոսում են, բայց հանրային դաշտից դուրս շպրտել նշանակում է ու՞ր տանել այդ մարդուն, լուսի՞ն, թե՞ կյանքից զրկել։

Եթե վարչապետը նման հայտարարություն է անում, մենք իրավական կոնսուլտացիա ենք արել և հիմա ես հայտարարություն եմ անում, որ հանրային դաշտից դուրս շպրտել նշանակում է կյանքից զրկել։ Պետք է ինքը բացատրություն տա, թե ինչ նկատի ուներ։

Մենք ինֆորմացիա ունենք, որ հրահանգ է տրվել իրենց Շիրակի մարզի և մնացած ԱԺ պատգամավորներին և նրանք հայտարարություններ են տարածում, անձնական դաշտ են մտնում, քաղաքական դաշտ են մտնում, ասում են՝ ճամպրուկները հավաքեք։ Մշտական թիրախավորում են նաև Մարտուն Գրիգորյանին, մյուսներին, թե ես ընտրվել եմ իրենց աջակցությամբ։ Դիտավորյալ սա սարքում են, հատուկ հանձնարարական է, որ ես ելնեմ նրանց բան ասեմ, նրանք ինձ բան ասեն, կոնֆլիկտ սարքել տան, սարքեն Փարաքարի դեպքերը։

Ես տարիքով մարդ եմ, մի անգամ արեցին այն ժամանակ, սուտ «Բարգավաճ»–«Հանրապետական» խաղացին, եղբորս տղեն 17 տարի նստած է։ Սուտ կլանային բաներ բերեցին, կապեցին, որ մենք ոխերիմ թշնամիներ ենք, մինչև այս վերջին ընտրությունները նույնը նորից տարածում էին, բայց մենք ինչքա՞ն կարող ենք դրանց խայծը ուտել, և մենք կարողացանք մեզ ճիշտ պահել»,– ասաց նա։

Վարդան Ղուկասյանի հիշեցրեց, որ մինչև ընտրությունները ոստիկանները իր մեքենան կանգնեցրել ու զենք են պահել իր վրա. «Իրենց ենիչերիներին ուղարկել էին, ավտոմատները դեմ տվեցին ապակու վրա, ավտոմատը «զարիժատ արեցին», որ հիմա կխփենք, եթե դուռը չբացես։ Երբ որ դուռը բացեցի սրանք,  պատկերացրեք, ինձ գցեցին գետին, հետո շղթաները կապեցին, հետո ավտոյի մեջ չթողեցին, որ նստեի, գցեցին մեքենայի հատակին։ Անգամ շներին այդ ձևի չեն մոտենում։ Սրանք բաշիբոզուկներ են»,– ասաց նա։