Մանր և միջին բիզնես ունեցող քաղաքացիները նորից բողոքի ակցիա էին կազմակերպել Կառավարության շենքի դիմաց։ Շրջհարկը 5 տոկոսից դարձել է 10 տոկոս, ինչը տնտեսվարողներին ստիպելու է ուղղակի կասեցնել իրենց բիզնեսը. դրանից տուժելու է պետբյուջեն, գործազրկությության տոկոսն է ավելանալու, ինչպես նաև՝ արտագաղթը։
Տարբեր պաշտոնյաների հետ հանդիպումները ոչինչ չեն տվել՝ բացի մանիպուլյացիայից՝ իբր տնտեսվարողներին պետբյուջեից հատկացվելու է 7,3 միլիարդ դրամ։
Բողոքի ակցիայի մասնակիցները նշել են, որ իրենց գործընկերներից շատերն արդեն իսկ իրենց բիզնեսը փակել են։ Նրանք պնդում են, որ հարկային փոփոխություններով իշխանությունները ոչ թե պայքարում են ստվերի դեմ, այլ հալածում են հարկ վճարող, իր աշխատռանքով իր ընտանիքը պահող քաղաքացիներին։
Տնտեսվարողները ստորագրահավաք են կազմակերպել ու իրենց պահանջը ներկայացրել կառավարությանը։
«Ստվերում աշխատողները նորից փաստաթուղթ չեն ունենալու, շրջհարկը ցույց չեն տալու, իրենց ելամուտները՝ նույնպես։ Սա օրինապահ հարկ վճարողների դեմ է։ Եթե ես ստվերում եմ, ՀԴՄ կտրոն չեմ տրամադրում, հետևաբար՝ 10 տոկոս շրջհարկը չեմ վճարում, իսկ նա, ով ՀԴՄ կտրոնը տալիս է, փաստաթղթերը մաքուր են, նրանց հարկային բեռն են ավելացնում։
7 տարի առաջ մեզ ասում էին՝ բյուջեն թալանվում է, էլ չի թալանվելու, ասում էին՝ հարկերը պիտի թանկանան, հետևաբար բյուջե ավելի շատ գումար է մտնում։
Բյուջեի մուտքերն ավելանում են, բայց չգիտես ինչու՝ բյուջեի դեֆիցիտն ու պետական պարտքն էլ է ավելանում, սա նշանակում է՝ մեր հարկերը ապաշնորհ կերպով են ծախսում, էս մարդիկ պետբյուջեն ծախսելու ձև չգիտեն, բայց անընդհատ հարկեր են ավելացնում
Ասում են՝ հարկերը բարձրացնում ենք, մենք էլ ասում ենք՝ եղբայր, մեզ ցույց տուր, թե մեր վճարած հարկերը ոնց ես ծախսում, որ բյուջեի դեֆիցիտ էլ կա, պետական պարտքն էլ է ավելանում»,-ասաց «Կասեցում» հասարական շարժման համակարգող Սամսոն Գրիգորյանը։
Մանրամասները՝ տեսանյութում.
