Պատանի հանդիսատեսի թատրոնի տնօրենին քաղաքապետարանն աշխատանքից ազատեց։ 2 ամիս աուդիտ, տարբեր ստուգումներ են անց կացվել, ոչ մի ապօրինություն, թերություն չեն գտել, ի վերջո, որոշվել է Էմին Թորոսյանից ազատվել՝ պատճառաբանելով, թե իբր նա հրավիրատոմսեր է տրամադրել։
Դա օրենքի սահմաններում է. թատրոնն իրավունք ունի հրավիրատոմսեր հատկացնել թոշակառուներին, ուսանողներին, հաշմանդամություն ունեցող երեխաներին։ Թատրոնը ոչ առևտրային կազմակերպություն է։
7 տարի Էմին Թորոսյանը ղեկավարել է Պատանի հանդիսատեսի թատրոնը։ Ամբողջ կազմը գոհ է նրա աշխատանքից։ Նա համապատասխան կրթություն ունի։ Այսինքն՝ ոչ մի «կեղտ չեն կարողացել բռնել», ոչ մի հիմնավորում չկա՝ ինչո՞ւ են նվիրված, ազնիվ աշխատող տնօրենին ազատում աշխատանքից։
Պատանի հանդիսատեսի թատրոնի ամբողջ կազմը քաղաքապետարանի որոշումը անհեթեթություն է համարում։ Ուղղակի քաղաքային իշխանությունն ուզում է իր մարդուն բերել-դնել թատրոնի տնօրենի պաշտոնին։ Տարբեր անուններ են շրջանառվում՝ ավագանու քպ-ական անդամ Տաթև Հովակիմյան, Ռուբեն Բաբայանի որդու անունը, անգամ խոսակցություններ կան, որ Պատանի հանդիսատեսին ուզում են միացնել այլ թատրոնի, ասում են նաև, որ թատրոնի շենքը 5 տարի առաջ վաճառվել է։
Պատանի հանդիսատեսի թատրոնի ամբողջ կազմը սպասում է, որ քաղաքապետարանից կգան, իրենց հետ կհանդիպեն, կլսեն բացատրություն՝ ինչո՞ւ են աշխատանքից ազատել Էմին Թորոսյանին։
7 տարի թատրոնը բոլոր պրեմիերաների հրավիրատոմսեր է ուղարկել քաղաքապետարան, 7 տարվա մեջ ոչ մի անգամ ոչ ոք ներկայացման չի եկել, թատրոնի դուռը չի բացել։
ՀՀ ժողովրդական արտիստ Արմեն Սանթրոսյանը 60 տարի աշխատում է Պատանի հանդիսատեսի թատրոնում. այսպիսի աբսուրդ, անտրամաբանական, հանցավոր որոշում, որ միտված է քանդել 95 տարեկան թատրոնը, երբեք չի տեսել։
Մանրամասները՝ տեսանյութում.
