Թուրքիայից ու Ադրբեջանից ակտիվ քարոզչություն է հորդում՝ իբր «Զանգեզուրի միջանցք» կոչվածն ընդամենը լոգիստիկ հարց է, որից Հայաստանին ոչ մի վնաս չկա, ընդհակառակը՝ օգտակար է ու տնտեսապես շահավետ։ Այս կեղծ թեզն են առաջ տանում նաև Հայաստանի իշխանությունները՝ անունը դնելով «Խաղաղության խաչմերուկ» կամ «արտապատվիրակված ճանապարհ»։
Թուրքագետներ Վարուժան Գեղամյանի և Ռուբեն Մելքոնյանի հեղինակած «Թուրանի ճանապարհի հայկական սեպը» գիտական ուսումնասիրությունը ցույց է տալիս, թե ինչ մեծ վտանգներ են ներկայացնում «Զանգեզուրի միջանցք», «Մեծ Թուրանի ծրագիր» հասկացությունները։ 120 տարի Թուրքիան շրջանառում է դրանք՝ նպատակ ունենալով Հայաստանի տարածքով՝ Սյունիքով Թուրքիան կապել Ադրբեջանի հետ, Նախիջևանը՝ Ադրբեջանի։
Բռնազավթված Արցախում ադրբեջանցիները ճանապարհաշինության մեծ ծրագիրն արդեն ավարտում են ու ավելի են մեծացնելու ճնշումները ՀՀ իշխանության վրա՝ պահանջելով այդ ճանապարհի շարունակությունն ապահովել Սյունիքով։ Սա միայն ճանապարհի հարց չէ, սա նշանակում է վտանգել Հայաստանի պետականությունն ու գոյություն ընդհանրապես։
