«Գոյ» թատրոնի աշխատակիցներն այսօր փորձեցին մտնել թատրոն, դուռը դարձյալ ներսից փակ էր։
Դռան վրա գրված է. «Հարգելի աշխատակիցներ, կարող եք մտնել Սունդուկյանի անվան թատրոնի ծառայողական մուտքից»։
Սակայն ծառայողականում էլ անցաթուղթ է պահանջվում, որը «Գոյի» հարգելի աշխատակիցները չունեն։ Սունդուկյանում էլ գիտեն, որ չունեն։
Ընդունման-հանձնման ակտը ստորագրվել է, թատրոնը լուծարվել է։ Ինչպես հայտնի է, տարեվերջին ԿԳՄՍ նախարարությունը «Գոյի» տնօրենին աշխատանքից ազատեց, նոր տնօրեն նշանակեց՝ «թուրք» մականվամբ Կարեն Սիմոնյանին։ Նրա ձեռքով էլ «Գոյը» լուծարվեց։
Իմանալով, որ Սունդուկյանի ծառայողականով մտնելու համար «Գոյ» թատրոնի աշխատակիցներին անցագրեր են պետք, սունդուկյանցիները դրա մասին նախօրոք չէին մտածել։ Ավելի ճիշտ՝ սպասում էին, որ «Գոյից» գան, ձևաթուղթը լրացնեն՝ իրենց անձնական տվյալները թողնելով թղթի վրա, մինչդեռ ընդունման-հանձնման ակտով գույքի հետ Սունդուկյանի թատրոնին են անցել նաև աշխատակիցների տվյալները։
Ինչևէ, «Գոյ» թատրոնի աշխատակիցներին Սունդուկյանի տնօրինությունը թույլ չտվեց ոչ մի մուտքով բարձրանալ։ Փոխտնօրեն Հրաչ Ներսիսյանն իջավ՝ անցագրայինում հանդիպելու «Գոյի» աշխատակիցների հետ։ Երկար բանակցություններից հետո, միևնույն է, դերասաններին ու ռեժիսորներին արգելվեց բարձրանալ «Գոյ»։
«Մեծահոգաբար» թույլատրվեց երկու հոգու՝ լրատվամիջոցների, անվտանգության աշխատակիցների ու Սունդուկյանի փոխտնօրենի ուղեկցությամբ բարձրանալ «Գոյ»։
Մանրամասները՝ տեսանյութում
