2022-ը Հայաստանի և Արցախի համար վայրիվերումների տարի էր. այն հույսը, որ գոնե այս տարի ՀՀ իշխանությունները պետք է քայլեր ձեռնարկեին՝ միջազգային հարթակներում առաջ մղելու հայկական շահը, ուղղակի հօդս ցնդեցին, Azg.am-ի թղթակցի հետ զրույցում ասաց քաղաքագետ Արթուր Ղազարյանը։
«Տարին ամփոփում ենք խայտառակ կարգավիճակում՝ Բերձորի միջանցքի և Արցախի շրջափակմամբ։ Հայաստանն ու Արցախն անասելի ողբերգական իրավիճակում են, պատերազմին հաջորդած ամեն տարին ավելի դժվարին է լինում, քան նախորդը։ Մեծ հիասթափություն և հուսահատություն է տիրում, ինչը լավ բանի մասին չի խոսում։
Սա խոսում է հասարակության անտարբերության մասին, և, ի վերջո, մարդիկ իրենց հայացքը ստիպված են լինում դրսին հառել»,- ասաց քաղաքագետը։
Արթուր Ղազարյանի խոսքով՝ ՀՀ իշխանություններն անցնող տարվա ընթացքում պետք է կարողանային գոնե նվազագույն չափով ազգային համախմբման հասնել, ինչը, սակայն, նրանց չհաջողվեց։
«Բոլորը, կարծեք թե, խոսում են միասնության մասին, բայց դրա համար նախևառաջ քաղաքական կամք է պետք։ Մենք քաղաքական տարին ամփոփում ենք լուրջ կորուստներով. եթե անդունդն էինք գլորվել, հիմա արդեն դժոխքում ենք, որտեղ մշուշ է և ոչ մի բան չի երևում։ Իսկ դժոխքից ելք գտնելը գրեթե անհնար է»,- ամփոփեց մեր զրուցակիցը։
