Վերջին օրերին Տավուշում տեղի ունեցող իրադարձությունները ներուժ ունեն վերաճելու համազգային ընդվզման։ Բայց այստեղ շատ հետաքրքիր պահ կա. պահ, որը նախորդ շարժումներում չի եղել. այստեղ չկա հստակ առաջնորդություն, Azg.am-ի թղթակցի հետ զրույցում ասաց վերլուծաբան Ստեփան Դանիելյանը։
«Ինչո՞վ է սա և՛ լավ, և՛ վատ։ Վատ է նրանով, որ երբ չկա առաջնահերթություն, ապա չկա նաև կոնկրետ պահանջ և կոնկրետ գործողությունների պլանավորում։ Սակայն ինչով է դա լավ և Տավուշի դեպքերը տարբերում է մյուսներից։ Լավն այն է, որ սա կարող է վերաճել համաժողովրդական շարժման, և գործող իշխանությունները չեն կարող տարբեր եղանակներով՝ կոմպորմատներով, ձերբակալություններով, պայմանավորվելով ազդել գործողությունները կազմակերպող որևէ կենտրոնի վրա»,- ասաց վերլուծաբանը։
Ստեփան Դանիելյանի խոսքով՝ չկան մարդիկ, ում հետ ՀՀ գործող իշխանությունները կկարողանան պայմանավորվել կամ նրանց վախեցնել։
«Սա ինչ-որ առումով ցանցային շարժում է, և այն իշխանությունների համար ամենավտնանգավորն է։ Երկրորդ՝ իրենք իրենց քայլերի համար որևէ բացատրություն չունեն։
Եվ երրորդ կարևոր պահը. փաստորեն առաջին պալան են դուրս եկել երկու սրբազանները, որոնք ակնհայտորեն իշխանության խնդիր չունեն, չեն պայքարում իշխանության գալու համար, և խնդիրները զուտ բարոյական հարթությունում են դրել։
Սա, իհարկե, գործող ռեժիմին փակուղի է տանում։ Իրենք քայլեր չունեն, բայց մյուս կողմից պետք է քաղաքական պրոցես լինի, որը, սակայն, դեռևս չի ձևավորվել»,- նշեց Ստեփան Դանիելյանը։
Հարցին՝ իսկ նման գործընթաց ձևավորելու պոտենցիալ կա՞, մեր զրուցակիցը դրական պատասխան տվեց։
«Իհարկե, քաղաքական գործընթացներ կարող են լինել, և նորից եմ կրկնում, երևի ամենալավը հենց ցանցային տարբերակն է, որ այդ ցանցի տարբեր ներկայացուցիչներ կարողանան կոորդիանցիոն խորհուրդ ստեղծել։ Այդ խորհրդին որևէ կենտրոնից չեն կարող կառավարել, պայմանավորվել»,- նշեց վերլուծաբանը։
Ստեփան Դանիելյանը միաժամանակ չբացառեց, որ Տավուշի օրինակով բողոքի ինքնաբուխ գործողություններ տեղի ունենան նաև հանրապետության մյուս բնակավայրերում։
«Ամեն դեպքում պրոցեսը հիմա Տավուշում է, և դա կարող է տարածվել մյուս տեղերում՝ Գյումրիում, Վանաձորում, Կապանում և այլն, այսինքն՝ տարածվելու էֆեկտ ունենա»,- ամփոփեց նա։
Հիշեցնենք, որ արդեն մի քանի օր է՝ Տավուշի մարզում լարված իրավիճակ է։ Գյողացիները փակ են պահում Ոսկեպար-Կիրանց ավտոճանապարհը։
Ուղևորափոխադրող տրանսպորտային ընկերություններից մեկի ներկայացուցիչը Sputnik Արմենիային-ին հայտնել է, որ Տավուշում ստեղծված իրավիճակի պատճառով ժամանակավորապես փոխվել է Երևան-Թբիլիսի երթուղին։
Այսօր իրավիճակը լարված էր հատկապես Ոսկեպարի Սուրբ Աստվածածին եկեղեցու հարակից տարածքում. Ոստիկանները և ԱԱԾ հատուկջոկատայինները թույլ չէին տալիս, որպեսզի քաղաքացիները մոտենան եկեղեցուն։
Ավելի ուշ, սակայն, բնակիչները Տավուշի թեմի առաջնորդ Բագրատ Սրբազանի առաջնորդությամբ մուտք գործեցին եկեղեցի։
