ԱԺ նախագահ Ալեն Սիմոնյանը չի բացառում, որ մի օր Հայաստանը կարող է ՀԱՊԿ-ից դուրս գալու որոշում կայացնի։
«Որևիցե մեկը չի բացառում. ՀԱՊԿ-ն ամեն ինչ անում է դրա համար»,- ԱԺ-ում լրագրողների հետ զրույցում ասաց նա։
Սիմոնյանի խոսքով՝ Ադրբեջանն ու Ռուսաստանը նոյեմբերի 9-ի փաստաթղթի հետ կապված Հայաստանին պատասխանելու բան ունեն՝ 1-ից 8-րդ կետերի վերաբերյալ։
«Իսկ 9-րդ կետի վերաբերյալ Հայաստանն իր պարտավորությունները կատարում է։ ՀՀ պարտավորություններն 9-րդ կետի և ամբողջ փաստաթղթի հիմքը դրված է խաղաղության խաչմերուկի տրամաբանության մեջ։ Այլ հարց է՝ արդյոք Ադրբեջանի և ՌԴ-ի մեր գործընկերները պատրաստ են իրականացնել 1-ից 8-րդ կետերը»,- ասաց Սիմոնյանը։
Անդրադառնալով ռուսական կողմից հնչող հայտարարություններին, թե ՀԱՊԿ-ից դուրս գալը Հայաստանի ժողովրդի շահերից չի բխում՝ ԱԺ նախագահն ընդգծեց. «Կարծում եմ՝ Հայաստանի հետ սպառնալիքների լեզվով խոսելը շատ սխալ տրամաբանություն է»։
Ալեն Սիմոնյանը միաժամանակ ընդգծեց, որ Հայաստանում հակառուսական արշավ չի եղել։
«Մի բան հարցնեմ էլի. եթե ես հարձակվեմ ձեր վրա ու դուք ինձ դիմադրեք, դա կլինի հակաալենյան արշա՞վ։ Այսինքն՝ պետք է թուլանայինք և հաճո՞ւյք ստանայինք»,- նշեց նա՝ խնդրելով ուղիղ չհասկանալ իր ասածը։
