Մենք պետք է քաջ գիտակցենք, որ ադրբեջանական զորամիավորումների ելքը դեպի Սևանա լճի արևելյան ափ (արդեն այժմ նրանք այդ հատվածին շատ մոտ են՝ 10-12 կմ հեռավորության վրա) գերնպատակ է դառնալու։ Դրա համար չպետք է զարմանալ, որ Ադրբեջանն իր ներխուժումների ժամանակ չի բավարարվելու անկլավներով, այլ նպատակ է հետապնդելու առաջին իսկ հնարավորության դեպքում ռազմակալել Հայաստանի Հանրապետության 40-50 տոկոսը՝ Սյունիքի մարզը, Վայոց ձորի մարզը, Արարատի, Տավուշի և Գեղարքունիքի մարզերի որոշ հատվածները։ Azg.am-ի թղթակցի հետ զրույցում այս մասին ասաց քաղաքագետ Ալեքսանդր Քանանյանը՝ անդրադառնալով ԴԱՀԿ նխկին պետ Միհրան Պողոսյանի տարածած այն հայտարարությանը, որ իրենց հավաստի տեղեկություններով՝ Ադրբեջանին հաջորդ նվերը Գեղարքունիքի երկու գյուղերն են լինելու, ինչի արդյունքում թշնամին անմիջական ելք է ունենալու Սևանա լիճ։
Մեր զրուցակիցը հիշեցրեց՝ Վարդենիսի հատվածում նախկին վարչական սահմանը վաղուց հատված է ադրբեջանական զորամիավորումների կողմից, որոնք որոշ տեղանքներում մինչև 7 կմ իջել են դեպի Սևանի ափ, և Վարդենիս քաղաքն ինքինին մեծապես վտանգված է։
«Ադրբեջանական ռազմական մոտորանավակները Սևանի ավազանում խաթարելու են ոչ միայն զբոսաշրջությունը և ձկնորոսությունը (նորատուսցիները չեն կարողանալու ծեծել ադրբեջանական նավատորմային զինվորականներին, ինչպես դա առժամանակ առաջ արեցին պարեկների հետ), այլև լողափերին կամ Սևանի թերակղզու անմիջական հարևանությամբ ադրբեջանցիները նավերով երթևեկելու են և կրակոցներ արձակելու։
Սա լինելու է ՀՀ վերջնական անդամալուծումը, որին կհետևի հայ ժողովրդի լայնածավալ արտագաղթ։ Սա իր հերթին թույլ կտա առավելագույնը 10 տարի հետո ոչնչացնել Հայաստանի Հանրապետությունը»,- նշեց քաղաքագետը։
Ալեքսանդր Քանանյանը միաժամանակ ուշադրություն հրավիրեց այն հանգամանքի վրա, որ Իլհամ Ալիևը պարբերաբար խոսում է այն մասին, որ Ադրբեջանը հետամուտ է լինելու Հայաստան ադրբեջանցի այսպես կոչված փախստականների վերադարձի խնդրին։
«Հայտնի է, որ Սևանի արևելյան ափը՝ Վարդենիս քաղաքից մինչև Ճամբարակի ամբողջ հատվածը, խորհրդային շրջանում եղել է գերազանցապես ադրբեջանաբնակ, և Ալիևը միշտ էլ պնդել է, որ ադրբեջանցիները պետք է վերադառնան այդտեղ՝ միևնույն պնդումներն անելով նաև Սյունիքի մարզի մասով։
Փաստացի կերպով տեղի է ունենում այն, ինչի մասին ոմանք՝ այդ թվում և ես, շատ վաղուց ասել ենք։ Բայց մեր խոսքն էական չէ, էականն Ադրբեջանի նպատակներն են. այդ երկիրն իր ամենաբարձր պաշտոնյաների մակարդակով հետևողականորեն օգտագործում է «Հայաստանի պայմանական սահման» հասկացությունը։ Ալիևն անձամբ բազմիցս հայտարարել է, որ իր համար խորհրդային վարչական սահմանները որևէ հիմք չեն»,- նշեց քաղաքագետը։
Քանանյանի խոսքով՝ ակնհայտ է, որ Ադրբեջանը մտադիր չէ փոփոխել իր սահմանադրությունը, իսկ ադրբեջանական սահմանադրությամբ Ադրբեջանն առաջին հանրապետության իրավահաջորդն է։
«Եթե նայելու լինենք, թե ադրբեջանական պատմագիտությունն ինչ սահմաններում է պատկերացնում առաջին ադրբեջանական հանրապետությունը, ապա կտեսնենք, որ Հայաստանին մնում են Բաթումի պայմանագրով վերապահված տարածքները՝ Երևանից մինչև Սևան՝ թերևս միայն Մարտունի և Էջմիածին քաղաքի մի մասը»,- նշեց մեր զրուցակիցը։
