Քաղաքագետ Արմեն Վարդանյանը վստահ է, որ Ալիևը Սևանի ափին երբեք թեյ չի խմի, քանի որ եթե կարողանար նման բան անել, ապա վաղուց արած կլիներ։
«Ամբողջ հարցն այն է, որ Ալիևին Արևմուտքից շատ լուրջ զգուշացրել են, որ ՀՀ միջազգայնորեն ճանաչված տարածքները կարմիր գիծ են, և եթե նա խախտի դա, շատ թանկ գին կվճարի»,- Azg.am-ի թղթակցի հետ զրույցում ասաց քաղաքագետը։
Դիտարկմանը, որ Ադրբեջանը Սևանի ավազանում և ՀՀ այլ տարածքներում արդեն իսկ փաստացի հատել է սահմանը և մի քանի կմ մխրճվել Հայաստանի սուվերեն տարածքներ, Արմեն Վարդանյանը պատասխանեց.
«Իրենք եկել են որոշակի բարձունքներ, ձորեր և այլն, և իրենց ալիբին այն է, որ սահմանները սահմազատված և սահմանագծված չեն, և չի երևում՝ որն է Հայաստանի, որն՝Ադրբեջանի սահմանը։ Բայց եթե Ալիևը թեկուզ մեկ հայկական գյուղ մտներ…
Ասենք Շուռնուխ գյուղը, որը մի սովորական ճանապարհով կիսվում է։ Այնտեղ՝ հայկական մասում, մի հենակետ է դրված՝ մեր մի քանի զինվորով, բայց Ալիևը ռիսկ չի անում մտնել Շուռնուխ։ Հիմա ինչո՞ւ է Ալիևը պահանջներ ներկայացնում Տավուշի մարզի գյուղերի մասով. որովհետև այդ 4 գյուղերի մասով միջազգային հանրությանը բերում է քարտեզներ, որ տեսեք՝ 70-ական թվականների քարտեզներով մեր այսինչ տարածքներն այժմ Հայաստանի ձեռքում են։ Ալիևը փորձում է լեգիտիմություն հաղորդել Հայաստանի դեմ իր ագրեսիային։
Սյունիքում էլ նա փորձում էր ինչ-որ բաներ անել, բայց կանգնեցրին՝ շատ հստակ մեսիջներ հղելով, Գեղարքունիքում ոչինչ չի փորձում, միայն Տավուշն է փորձում խոցելի դարձնել»։
Արմեն Վարդանյանը միաժամանակ շեշտեց՝ հայկական բանակն այլևս այն վիճակում չէ, ինչ 2020-2021 թվականներին. այժմ տարբեր ուղղություններից սպառազինություններ են ստացվում։
«Կրկնում եմ՝ Սևանի մասով ես բացարձակապես որևէ մտավախություններ չունեմ, որ կարող է ադրբեջանցիներն ինչ-որ գյուղ գրավեն կամ Սևանա լիճ հասնեն։ Դա քարոզչական հնարք է։
Ինչ վերաբերում է Տավուշին, ապա Նիկոլ Փաշինյանն ասում է՝ եկեք սահմանազատում-սահմանագծում անենք, այդ տարածքները միջազգայնորեն ճանաչվեն, որ Ադրբեջանին հարձակվելու լեգիտիմ առիթ չտանք։ Իհարկե, ես չեմ կիսում նրա տեսակետը, որովհետև մտածում եմ, որ Տավուշում են սկսել սահմանազատումն ու սահմանագծումը, որովհետև Տավուշից ստանալու բան ունեն։ Ալիևը խորամանկ պլանը հենց սրանում է կայանում»,- ամփոփեց Արմեն Վարդանյանը։
Հիշեցնենք, որ ԴԱՀԿ նախկին պետ Միհրան Պողոսյանի տարածած այն հայտարարությանը, որ իրենց հավաստի տեղեկություններով՝ Ադրբեջանին հաջորդ նվերը Գեղարքունիքի երկու գյուղերն են լինելու, ինչի արդյունքում թշնամին անմիջական ելք է ունենալու Սևանա լիճ։
«Փաստացի կյանքի է կոչվում Սևանա լճի ափին թեյ խմելու Ալիևի վաղեմի երազանքը»,- նշված է հայտարարության տեքստում։
