Ադրբեջանը շտապում է օր առաջ օգտվել հարմար պահից՝ ստիպելու Հայաստանին կնքել իր համար ցանկալի խաղաղության պայմանագիրը. քաղտեխնոլոգ

Ադրբեջանը հրաշալի գիտակցում է, որ հապճեպ պատրաստված խաղաղության պայմանագիրն ապագայում նոր հակամարտության նախադրյալներ կստեղծի ՝ իր համար ցանկալի ելքով, դրա համար էլ հնարավորինս արագացնում է փաստաթղթի ստորագրման գործընթացը։ Azg.am-ի թղթակցի հետ զրույցում նման համոզմունք հայտնեց քաղտեխնոլոգ Արմեն Բադալյանը՝ անդրադառնալով ՌԴ ԱԳՆ ԱՊՀ երկրների չորրորդ վարչության տնօրեն Դենիս Գոնչարի այն հայտարարությանը, որ խաղաղությանպայմանագրի կնքմանն ընդառաջ՝ առաջնահերթությունը պետք է տրվի ոչ թե արագությանը, այլ հավասարակշռված և փոխընդունելի լուծումների որակյալ նախապատրաստմանը։

Նրա խոսքով՝ որքան էլ Ռուսաստանն ամբողջովին զբաղված է ուկրաինական գործընթացներով, սակայն դա ամենևին չի նշանմակում, որ աչքաթող է արել մյուս գործընթացները։

«Հաշվի առնելով այն հանգամանքը, որ Ռուսաստանի ռազմական, քաղաքական և տնտեսական ողջ պոտենցիալն օգտագործվում է ուկրաինական ճակատում՝ Ադրբեջանը շտապում է օր առաջ օգտվել այս հանգամանքից։ Նպաստող հանգամանք է հանդիսանում նաև երկրորդ գործոնը, որ այս պահին հայ-ռուսական հարաբերություններն այդքան էլ բարձր մակարդակի վրա չեն։

Ստեղծված իրավիճակում Ադրբեջանը ցանկանում է ստիպել Հայաստանին կնքելու իր համար ցանկալի խաղաղության պայմանագիրը»,- ասաց քաղտեխնոլոգը։

Անդրադառնալով ռուս բարձրաստիճան պաշտոնյայի հայտնած այն մտքին, որ արևմտյան մայրաքաղաքներից պարբերաբար հայտարարություններ են հնչում՝ իբրև խաղաղության պայմանագիրը կարող է կնքվել «գրեթե մոտակա շաբաթների և ամիսների ընթացքում, Արմեն Բադալյանը նկատեց՝ ՌԴ-ն շատ լավ հասկանում է, որ Արևմուտքի կողմից հապճեպ կերպով կնքված պայմանագրի հիմնական իմաստն այն չէ, որ խաղաղություն լինի, այլ այն, որ ռուս խաղաղապահները հեռանան Արցախից, և Ռուսաստանի ազդեցությունն Ադրբեջանի վրա գրեթե զրոյանա։

«ՌԴ-ն շատ լավ հասկանում է, որ Արցախից հետո հնարավոր է նաև Հայաստանից ռուսական ռազմաբազայի հեռացումը, որովհետև խաղաղապահների հեռանալուց հետո հայերը կլքեն Արցախը, և հակառուսական տրամադրություններ կստեղծվեն, ինչն էլ կհանգեցնի ռուսական բազայի դուրսբերմանը և ՆԱՏՕ-ական ռազմաբազայի ներդրմանը։

Դա կնշանակի, որ Ռուսաստանի ուղեծրից դուրս են գալիս թե՛ Հայաստանը, և թե՛ Ադրբեջանը, և Ռուսաստանն էականորեն կթուլանա»,- ասաց Արմեն Բադալյանը։