Իլհամ Ալիևն օրինական նախագահ չէ։ Նա, Ստեփանակերտի գրանցում չունենալով հանդերձ, իր ընտանիքի անդամների հետ քվեարկել է Ստեփանակերտի ընտրատեղամասում, մինչդեռ ադրբեջանական սահմանադրությամբ դա օրենքի խախտում է ։ Azg.am-ի թղթակցի հետ զրույցում ասաց ադրբեջանագետ Գրիգորի Այվազյանը՝ անդրադառնալով արտահերթ ընտրություններում Ալիևի հաղթանակին։
Մեր զրուցակցի գնահատմամբ՝ առավել հավանական է, որ ընտրություններում հաղթանակ գրանցելուց հետո Բաքվի բռնապետը Հայաստանի նկատմամբ առավել թշնամական դիրքորոշում որդեգրի՝ մանավանդ, որ միջազգային ուժերը նրան դա թույլ են տվել։
«Վիճակն ավելի է սրվելու՝ ընդհուպ մինչև նոր պատերազմ, որովհետև դա ներքաղաքական կյանքում Իլհամ Ալիևի՝ իշխանությունը պահելու միակ հնարավորությունն է։ Այլ հնարավորություն նա չունի»,- ասաց Գրիգորի Այվազյանը։
Ադրբեջանի նախագահի պաշտոնում Ալիևի վերընտրվելն, ըստ ադրբեջանագետի, այդ երկրի ներսում սկիզբ է դնելու նոր բռնաճնշումների, ազատ խոսքի սահմանափակման և այլն։
«Այդ ամբողջն անշուշտ լինելու է՝ և՛ բռնաճնշումներ, և ազատ խոսքի սահմանափակումներ։ Սակայն 44-օրյա պատերազմից և սեպտեմբերյան բռնկումից հետո Ադրբեջանում զուգահեռ կերպով դժգոհության մեծ ալիք է բարձրանում։ Ադրբեջանական հասարակությունը բողոքում է, որ մարդկանց կյանքը չի բարելավվում։
Բացի այդ՝ ամեն օր տեղեկություններ են ստացվում, որ սահմանին մեծ թվով լեզգիներ և թալիշներ են զոհվում։ Սա առաջ է բերում նաև Ադրբեջանում բնակվող ազգային փոքրամասնությունների դժգոհությունը»,- ասաց Գրիգորի Այվազյանը։
Ադրբեջանագետն ընդհանուր առմամբ չի բացառում, որ այս բոլորը, միասին վերցրած, սոցիալական բունտի առիթ հանդիսանան։
«Շարքային ադրբեջանցիների սոցիալական վիճակը չի բարելավվել։ Միայն պետք է տեսնել, թե ինչպես են ապրում 44-օրյա պատերազմի մասնակիցների ընտանքիները. շատերը նույնիսկ հաց գնելու փող չունեն, ծայրահեղ աղքատության մեջ են։
Մարդիկ թափում են իրենց շքանշանները, ասում են՝ «Ինչի՞ համար ենք պատերազմել, Ալիևը մեր երեխաներին տարել է, զոհաբերել, իսկ մենք այս վիճակո՞ւմ ենք ապրում։ Ասում էր՝ Արցախը գրավենք՝ լավ ենք ապրելու, ո՞ւր է այդ լավ կյանքը»։ Ընդ որում, նման բողոքներ լսելի են ինչպես ազգային փոքրամասնությունների ներկայացուցիչների, այնպես էլ հենց ադրբեջանցիների կողմից»,-ասաց Այվազյանը։
Ինչ վերաբերում է վերընտրված Ալիևի նկատմամբ արտաքին խաղացողների վերաբերմունքին, ադրբեջանագետը շեշտեց՝ բոլոր հարթակներում Ալիևին մեղադրում են Արցախի գրավման մեջ, և քանի որ վերջինիս կապիտալի մեծ մասը գտնվում է արտասահմանում, ենթադրվում է, որ Ադրբեջանի նախագահի վրա ճնշում բանեցնելու լծակներ առկա են։
«Մյուս կողմից ակնհայտ է, որ որքան մեծ ճնշում լինի, այնքան Հայաստանի հանդեպ ավելի ագրեսիվ կլինի Ալիևը։ Մնում է, որ կարողանանք դիմագրավել նոր ագրեսիային, իսկ այն իրեն երկար սպասեցնել չի տալու»,- ամփոփեց մեր զրուցակիցը։
Հիշեցնենք, որ Ադրբեջանում երեկ կայացած արտահերթ նախագահական ընտրություններում նախնական տվյալներով ձայների 93,9 տոկոսով հաղթել է երկրի գործող ղեկավար Իլհամ Ալիևը։
