Ընդամենը մի քանի օր առաջ նույն Հակոբ Արշակյանը, մեծ համաժողովի ժամանակ սգո դեմք ընդունած, բողոքում էր, որ ոմանց ձերբակալում են, խորհուրդ էր տալիս անպայման ընթերցել ձերբակալված անձանցից մեկի հեղինակած գիրքը (խոսքն «Արհեստական բանականությունը բիզնեսի համար» համաժողովը, որտեղ Արշակյանը ներկայացրեց «Սիներջի» ընկերության տնօրեն Աշոտ Հովհաննիսյանի՝ վերջերս հրատարակված «Վերելք» գիրքը` խմբ.)։ Azg.am-ի թղթակցի հետ զրույցում ասաց քաղտեխնոլոգ Վիգեն Հակոբյանը՝ զուգահեռներ տանելով Նիկոլ Փաշինյանի՝ «Անվտանգային միջավայր» հաղորդաշարին տված հարցազրույցից հետո Հանրային ռադիոյի տնօրեն Գարեգին Խումարյանի հրապարակային անդրադարձին և ԱԺ փոխնախագահ Հակոբ Արշակյանի՝ վերջինիս հակադարձող ֆեյսբուքյան գրառման միջև։
«Ընդ որում՝ Արշակյանը ճիշտ էր ասում, որովհետև այն, ինչ տեղի ունեցավ այդ մարդկանց հետ, ևս մեկ անգամ ցույց տվեց, որ իրավապահ համակարգի գործողությունները, որոշումներ ընդունելն ու դրանք ի կատար ածելը կառավարվում են մեկ տեղից. դրանք կոորդիանացվում են անձամբ ՀՀ վարչապետի կողմից։ Այսինքն՝ Հակոբ Արշակյանի բողոքն ուղղակիորեն ուղղված էր վարչապետի դեմ։
Երբ Արշակյանը դժգոհում է իրավապահ համակարգի գործողություններից, շատ լավ հասկանում է, որ նրանք ուղղակիորեն կատարածու են, և ինչ պատվեր իջեցվում է, այն էլ անում են։ Կարծում եմ՝ դրանից հետո որոշակի կոշտ խոսակցություն է եղել Հակոբ Արշակյանի հետ, որի հետևանքով նա այսօր որոշել է պաշտպանել Հանրային ռադիոյի պատիվը, մտավարժանքներ անել, թե Հանրային ռադիոն ումն է»,- ասաց քաղտեխնոլոգը։
Վիգեն Հակոբյանի կարծիքով՝ ռադիոտունը և Գարեգին Խումարյանի դեմարշը բավական սիմվոլիկ նշանակություն ունեն՝ հատկապես այն առումով, որ 2018 թվականին հենց Հանրային ռադիոյից էր սկսվել իշխանափոխության գործընթացի առանցքային հատվածը (Նիկոլ Փաշինյանն իր աջակիցների հետ 2018-ի ապրիլի 14-ին ներխուժել էր Հանրային ռադիոյի շենք, կոտրել դուռը և մուտք գործել եթերային սենյակ՝ խմբ.):
«Կարծում եմ՝ սա սիմվոլիկ նշանակություն ունի և նույն տեղում էլ առանցքային նոր հատված է սկսվելու, այսինքն՝ Հանրային ռադիոյից սկսվեց տուրուդմփոցը, Հանրային ռադիոյով էլ կարծես ՝ ընդհանուր պրոցեսի փակման մի նոր էջ է բացվում։ Փաշինյանը բավականին ապավինում է սիմվոլներին, և կարծում եմ՝ այս ամենը նրա համար վատ զանգ է։
Մյուս կողմից Գարեգին Խումարյանը պրոֆեսիոնալ է, և նրա գենետիկական կոդը տարբերվում է ՔՊ-ական կոդից, և նրա՝ դուռը շրխկացնելով հեռանալը բնականոն կլինի։ Նա չի հեռացել, բայց նրա հայտարարությունը կարծես այդպիսին է։ Կարծում եմ՝ սա կարող է կատալիզատոր լինելայն զանգվածների համար, որոնք ժամանակին և հիմա էլ ավելի հանդուրժող են եղել այս իշխանությունների նկատմամբ»,- ասաց քաղտեխնոլոգը։
Վիգեն Հակոբյանն ընդգծեց՝ որքանով ճանաչում է Գարեգին Խումարյանին, նա պայքարող տեսակ է և բացառված է, որ նա որևէ գործարքի գնա՝ մասնավորապես իրեն աշխատանքից ազատելու դեպքում համաձայնի հայտարարել, որ հեռանում է սեփական դիմումի համաձայն։
«Ի տարբերություն այս իշխանության ներկայացուցիչներից շատերի՝ Գարեգին Խումարյանի առաջին աշխատավայրը չի եղել Ազգային ժողովը կամ Կառավարությունը»,- ամփոփեց մեր զրուցակիցը։
Հիշեցնենք, որ Հայաստանի հանրային ռադիոյի գործադիր տնօրեն Գարեգին Խումարյանը երեկ անդրադարձել էր վարչապետ Նիկոլ Փաշինյանի՝ «Անվտանգային միջավայր» հաղորդաշարին տված հարցազրույցին։ Նա ներողություն էր խնդրել ունկնդիրներից։
«Հանրային ռադիոյի այս տաղավարում հունվարի 31-ին տեղի ունեցածը լավ ժուռնալիստիկա չէր։ Ներողություն եմ խնդրում Հանրային ռադիոյի այն ունկնդիրներից, ում սպասելիքները չարդարացրինք։ Վարչապետի հետ մեր հարցազրույցն անկասկած շատ ավելի լավը կարող էր լինել։
Հիմա բուն տեղի ունեցածի մասին։
Հունվարի 31-ին այս տաղավարում ծավալված ու մեր ռադիոլսողներից շատերի մոտ հարցեր առաջացրած խոսույթը քաղաքական չէր։ Այն «խորհուրդ խորին»-ի շուրջ էր՝ մեր երկրի գոյաբանական իմաստների ու մեր ինքնության շուրջ։
Այն ծավալվել է իմ ղեկավարած լրատվամիջոցում, և որպես տան տեր պիտի մի երկու բառ էլ ես ասեմ։
Անցած շաբաթ այս տաղավարում մեզ առաջարկվել է դադարել լինել այն, ինչ ենք։ Մեզ ասվել է՝ թուրքերն ուժեղ են, հայերը՝ թույլ։ Թուրքերը կոտորում են հայերին։ Այս սիլլոգիզմը պիտի որ ավարտվեր «եկեք ուժեղանանք» դեդուկտիվ եզրահանգմամբ, բայց փոխարենը հնչեց «եկեք դադարենք հայ լինել»-ը»-գրել էր Խումարյանը։
ԱԺ փոխնախագահ Հակոբ Արշակյանը ֆեյսբուքյան էջում իր հերթին հակադարձել էր, որ Հանրային ռադիոյի տան տերը հանրությունն է, ռադիոյի տնօրենն ընդամենը ռադիոյի տնօրենն է։
