Ադրբեջանն իր գործողություններով փորձում է կոտրել արցախցուն՝ նրա մոտ նահանջի վարքագիծ ձևավորելու, Լաչինի միջանցքի բացվելուն պես Արցախը լքել ստիպելու համար։ Նիկոլ Փաշինյանն իր հերթին իբր քաղաքական վերլուծության արդյունքում է նույն մտքին հանգում և այդ միտքը հանրայնացնում է արդեն պաշտոնական մակարդակով՝ կառավարության նիստի ժամանակ, Azg.am-ի թղթակցի հետ զրույցում ասաց քաղտեխնոլոգ Վիգեն Հակոբյանը։
Հիշեցնենք՝ գործադիրի երեկվա նիստում Փաշինյանը հայտարարել էր, որ իր ունեցած տեղեկություններով՝ Բաքվի պլանը հետևյալն է՝ Լեռնային Ղարաբաղում տնտեսական, հոգեբանական ճնշումը հասցնել կուլմինացիոն կետի, դրանից հետո մի քանի օրով բացել միջանցքը՝ ակնկալիքով, որ արցախահայերը զանգվածաբար կլքեն իրենց տները, կրկին փակել միջանցքը ու հետո կրկին մի քանի օրով բացել ու այդպես այնքան, մինչև վերջին հայը կլքի Լեռնային Ղարաբաղը։
Վիգեն Հակոբյանի խոսքով՝ այն, ինչ Ադրբեջանն անում է կոնկրետ գործով, նույնը խոսքով անում է ՀՀ վարչապետը։
«Ես չեմ ուզում ասել, թե Նիկոլ Փաշինյանն է բացահայտում այս պլանը։ Այդ պլանի մասին վաղուց են խոսում, բոլորն էլ հասկանում են դա, քանի որ Ադրբեջանի ծրագիրը շատ բարդ չէ։ Հիմա ուղղակի Փաշինյանն ասում է, որ ադրբեջանցիները մի քանի օրով բացելու են Լաչինի միջանցքը և այս կերպ համապատասխան տրամադրություններ է ստեղծում՝ կարծես ասելով, որ մարդկանց Արցախից դուրս գալու հնարավորություն է ընձեռվելու։ Ըստ էության՝ նա Ադրբեջանի ծրագրի մասին է խոսում»,- ասաց Վիգեն Հակոբյանը։
Քաղտեխնոլոգը շեշտեց՝ ամբողջ խնդիրն այն է, որ ՀՀ վարչապետն այսքանից հետո չի ասում, թե ստեղծված իրավիճակում ինչ է անելու Հայաստանի իշխանությունը։
«Փաշինյանի խոսքերն իսկապես կարող են նպաստել Արցախից որոշ թվով մարդկանց դուրս գալուն՝ մանավանդ եթե նա այլընտրանք չի ներկայացնում, թե ինչ է պատրաստ անել Հայաստանը։ Նա իր դիրքորոշմամբ արցախցիների մոտ էլ ավելի է խորացնում վախն ու խուճապային տրամադրությունները»,- ասաց Հակոբյանը։
Վերջում մեր զրուցակիցն ընդգծեց՝ եթե դիտարկելու լինենք Ադրբեջանի վարքագիծը, ևս մեկ անգամ ակնհայտ կդառնա, որ նրա գլխավոր նպատակն Արցախի հայաթափումն է, այդ թվում՝ կյանքի համար անտանելի պայմաններ ստեղծելով, էներգետիկ, սննդի և կոմունիկացիոն սահմանափակումների օղակն աստիճանաբար սեղմելով։
«Ադրբեջանը պերմանենտ միացնում-անջատում է Արցախի գազամատակարարումը և էլեկտրասնուցումը, որպեսզի ցույց տա, որ կարող է միաժամանակ անջատել էներգետիկ բոլոր ռեսուրսները։ Ալիևն աշխատում է արցախցիների երևակության վրա՝ կարծես հարցնելով՝ արժե՞ այս պայմաններով Արցախում ապրել»,- եզրափակեց քաղտեխնոլոգը։
