Փաշինյանի գռեհիկ բառապաշարի ֆոնին ՔՊ-ականները «պայքարում» են «գողականի» քարոզի դեմ

Քրեական ենթամշակույթ քարոզող, բռնության տեսարաններով ֆիլմերը, հաղորդումները հետայսու հանրային մուլտիպլեքսում (մասնավորապես հեռուստատեսությամբ) կարող են հեռարձակվել միայն հատուկ ժամերի՝ 00.00-06.00, եւ հատուկ՝ «18+» գրությամբ:

Քրեական ենթամշակույթը հասարակությանը ժամով հրամցնելու մասին են մտածել Ազգային ժողովի նախագահ Ալեն Սիմոնյանն ու իշխող «Քաղաքացիական պայմանագիր» խմբակցության քարտուղար Արթուր Հովհաննիսյանը:

Պատգամավորներն առաջարկում են խմբագրել «Տեսալսողական մեդիայի մասին» օրենքը, քանի որ եթերում շատ է քրեական ենթամշակույթի քարոզը, ինչն, ըստ Հովհաննիսյանի, «գողականների» ռոմանտիզացված կերպարների տարածումն է, որ ազդում է անչափահասների վրա: «Դրանցում շատ է գռեհկաբանությունը, հայհոյախոսությունը, քարոզում են անբարո ապրելակերպ»,- նշում է ՔՊ-ականը:

Օրենքում փոփոխություններ անելու առաջարկ ունի նաեւ ՔՊ-ական մեկ այլ պատգամավոր՝ Հասմիկ Հակոբյանը: Ըստ նրա՝ պետք է այնպես լինի, որ ծնողները կարողանան գաղտնաբառ դնել «catch up»-ի ժամանակ, այնպես ինչպես «18+» ֆիլմերի դեպքում է:

Պատգամավորը սակայն կարծում է, որ պետք է հստակեցնել քարոզի սահմանումը կամ չափումը. «Բրիգադա» ֆիլմը` օրինակ, որտեղ ամբողջ սերիալում այդ կերպարների ռոմանտիզացիա է, իրենք ընկերներով հաջողություններ են ունենում, հարստանում են, վերջում ընկերներին կորցնում են. հիմա սա քարո՞զ է, թե՞ հակաքարոզ: Այս չափորոշիչը շատ հստակ պետք է լինի` ո՞ր ֆիլմն է քարոզ, որը՝ ոչ»:

Խիստ ուշագրավ է, որ պատգամավորները նույնպիսի խանդավառությամբ չեն քննարկում (քննադատելու մասին խոսելն ավելորդ է) սեփական կուսառաջնորդի՝ Նիկոլ Փաշինյանի բառապաշարը: Իհարկե, լավ չէ, որ հասարակությունը սնվում է «գողականի» նիստուկացի քարոզով, բայց տրմաբանական կլիներ, որ նույն հաջողությամբ ոչ միայն հեռուստաեթերից, այլեւ երկրի բարձրագույն ամբիոններից բացառվեր, օրինակ, «ասֆալտներին կպառկեցնենք», «թաթիկները կկտրենք», «պատերին կծեփենք», «պետք լինի, ուրիշ բան էլ թափ կտամ» ոչ պակաս գռեհիկ արտահայտությունները:

Ինչ վերաբերում է առաջարկվող փոփոխություններին, դրանք դրական ազդեցություն չեն ունենա. քրեական ենթամշակույթի բովանդակությամբ հաղորդումները կամ ֆիլմերը ոչ պակաս դիտելիություն կուենան նաեւ կեսգիշերից հետո:

Մյուս կողմից՝ եթե անգամ նման բովանդակությունն առհասարակ արգելվի հեռարևձակել, ապա այն տարածվելու է սոցիալական ցացներում ու համացանցային այլ հարթակներով:

ՍԵՎԱԿ ՎԱՐԴՈՒՄՅԱՆ