Ադրբեջանը Հայաստանի ինքնիշխան տարածքների նկատմամբ հավակնություններ ունի, և դեռ 2021 թվականից անարգել առաջ է գալիս դեպի մեր երկրի խորքերը։
Հիշեցնենք, որ ադրբեջանական զինուժը Հայաստանի տարածքից օկուպացրել է մոտ 130 քկմ։
Ադրբաջանական հավակնությունների մասին ԱԺ-ում իր ելույթի ժամանակ խոսել է նաև Նիկոլ Փաշինյանը. «Մենք ասում ենք՝ շատ լավ, եկեք հասկանանք, որ եթե ինչ-որ տարածքներից Հայաստանը պետք է դուրս գա, ի՞նչ սահմանով պետք է դուրս գա, այսինքն՝ որտեղից որտեղ պետք է գնա: Եթե մենք հասկանանք, ճշգրտենք այդ սահմանը, դա կարող է Հայաստանի համար լինել շատ ընդունելի խոսակցություն: Եթե վերցնում ենք Խորհրդային Միության սահմանը, եւ եթե Ադրբեջանը ասում է, որ Հայաստանն, օրինակ, հյուսիս-արեւելքում օկուպացիայի տակ է պահում Ադրբեջանի որոշ տարածքներ, նշանակում է, որ ինչ-որ տարածքային բաժանում կա, սահման կա: Մենք ասում ենք՝ շատ լավ, ցույց տվեք գիծը, ցույց տվեք մեզ քարտեզը, եւ դա կարող է լինել հետաքրքիր: Մենք դա չենք մերժում, որովհետեւ այդ նույն տարածքներում հայկական 4 գյուղերի տարածքների մեծամասնությունն օկուպացված է: Օրինակ, Տավուշի մարզի Բերքաբեր գյուղի վարելահողերի մոտ 70 տոկոսն օկուպացված է: Պառավաքար գյուղի վարելահողերի մոտ 70 տոկոսն օկուպացված է: Օկուպացված են Այգեհովիտ, Վազաշեն գյուղերի վարելահողերը: Դա տեղի է ունեցել 1991-ին, 1992-1994 թվականներին:
Դրա համար մենք ասում են՝ ցույց տվեք, թե որտեղ է գիծը, եւ ձեր ցույց տված սահմանի գիծն ինչ իրավական հիմնավորում ունի: Այդ դեպքում մենք պատրաստ ենք իրադրությունը զարգացնել, մինչեւ ամբողջ սահմանի երկայնքով ոչ հայասատնյան, ոչ ադրբեջանական օկուպացված տարածքներ չլինեն: Մենք պատրաստ ենք գնալ այդ լուծումներին, եւ ես պատրաստ եմ այդ պատասխանատվությունը վերցնել ինձ վրա»,- Ադրբեջանի հետ տարածքային վեճերը ներկայացրեց Փաշինյանը։
