Հաշվի առնելով Վրաստանի և՛ աշխարհագրական դիրքը, և՛ աշխարհաքաղաքական նշանակությունը՝ այդ պետությունը Հայաստանի համար շատ կարևոր երկիր է, ընդ որում՝ առկա է հայ-վրացական չիրացված ահռելի պոտենցիալ։ Azg.am-ի թղթակցի հետ զրույցում այս մասին ասաց քաղաքագետ Դավիթ Ստեփանյանը՝ անդրադառնալով Վրաստանի վարչապետ Իրակլի Կոբախիձեի՝ այսօր ՀՀ կատարած պաշտոնական այցին։
Նրա խոսքով՝ Վրաստանը Հայաստանի համար իրական դարպաս է դեպի Եվրոպա՝ քանի դեռ փակ է հիմնական դարպասը՝ Թուրքիան։
«Մյուս կողմից, Վրաստանի հետ բավական ակտիվ աշխատում է Ադրբեջանը, և միայն վերջերս է, որ մենք ևս սկսել ենք ակտիվ աշխատել Թբիլիսիի հետ։ Պատճառն այն է, որ Հայաստանը Վրաստանի հետ բավականին լուրջ շահերի համընկնում ունի։ Իսկ շահերի համընկնումն ընկած է ցանկացած քաղաքականության հիմքում. կան համատեղ շահեր՝ փոխգործակցությունը կստացվի, չկան՝ անիմաստ է ինչ-որ բան անել։ Ընդ որում՝ ես չգիտեմ՝ մեր ղեկավարությունը քննարկո՞ւմ է Վրաստանի հետ շահերի համընկնումը, թե ոչ»,- ասաց Դավիթ Ստեփանյանը։
Իսկ թե որն է Երևանի և Թբիլիսիի շահերի համընկնումը, մեր զրուցակիցն ընդգծեց՝ եթե տեղի ունենա ռուս-թուրքական հերթական գործարքը, և Հայաստանը, որպես պետականություն, կործանվի, Վրաստանի հարցը կդառնա զուտ ժամանակի խնդիր։
«Նույնը սպասելու է Վրաստանին, որովհետև այն դառնալու է «կղզի». հիմա այն թերակղզի է, որովհետև նրա կողքին է Հայաստանը։ Եթե թուրքերն ու ռուսները Հայաստանի մասով գործարք կատարեն, որի սկիզբը կկոչվի «Զանգեզուրի միջանցք», և Հայաստանը, որպես պետականություն, ընկնի, Վրաստանին կմնա հաշված ժամանակ՝ ամիսներ կամ տարիներ։
Սա է պատճառը, որ մենք Վրաստանի հետ պետք է մեր քաղաքականությունը կառուցենք այս հենքի վրա»,- ասաց քաղաքագետը։
Անդրադառնալով Տավուշի 4 գյուղերի հանձնման հետևանքով հայ-վրացական միջպետական ճանապարհի մի հատվածի՝ Ադրբեջանի վերահսկողության տակ անցնելուն՝ Դավիթ Ստեփանյանը նշեց՝ ինքը կապի մեջ է տեղի բնակչության հետ և որքանով հասկանում է՝ հանձնվելիք տարածքները խոտհարքեր են, որտեղով որևէ կոմունիկացիա չի անցնում։
«Ամենամոտ հատվածը, որ մոտենում է հայ-վրացական ճանապարհին, մոտավորապես 50-60 մետր է։ Բայց խնդիր կարող է լինել այն դեպքում, եթե ՀՀ ղեկավարությունը որոշի հանձնել Ոսկեպարը՝ որպես անկլավ. այդ դեպքում պետք է նաև այդ անկլավ գնացող ճանապարհ տրամադրվի։ Այդ դեպքում ճանապարհը հատելու է հայ-վրացական միջպետական ճանապարհը և հարվածի տակ է դնելու Հայաստան մտնող գազամուղը։
Ինչ վերաբերում է Վրասատնին, ապա Հայաստանի հետ կապի սահմանափակումը ցանկացած դեպքում չի կարող ողջունելի և ձեռնտու լինել։ Կարծում եմ՝ այդ երկրի վարչապետը Բաքվում և Երևանում արծարծել է այս հարցը։ Եթե վաղը ադրբեջանցիները փակեն գազամուղը, Վրաստանը զրկվելու է տրանզիտի գումարներից, տուժելու է հայ-վրացական առևտրաշրջանառությունը և այլն»,- ամփոփեց քաղաքագետը։
Հիշեցնենք, որ Վրաստանի վարչապետ Իրակլի Կոբախիձեն այսօր պաշտոնական այցով ժամանել է Երևան։
Վրաստանի վարչապետը Երևանում հանդիպումներ կունենա ՀՀ նախագահ Վահագն Խաչատուրյանի, վարչապետ Նիկոլ Փաշինյանի հետ։
Երկու երկրների ղեկավարները հանդիպումից հետո հանդես կգան ԶԼՄ-ների համար հայտարարություններով։
