Որևէ նախադրյալ չկա՝ հայտարարելու, որ Թուրքիան պատրաստ է Հայաստանի հետ հարաբերությունները կարգավորել առանց նախապայմանների։ Azg.am-ի թղթակցի հետ զրույցում այս մասին ասաց քաղաքագետ Արմեն Բաղդասարյանը՝ անդրադառնալով կողմերի՝ ՄԱԿ-ի Գլխավոր վեհաժողովի 79-րդ նստաշրջանի շրջանակում հնչեցրած հանձնառությանը՝ կարգավորման գործընթացը շարունակել առանց նախապայմանների։
«Թուրքական կողմը բազմիցս հայտարարել է, որ պատրաստ է առանց նախապայմանների հարաբերություններ կառուցել Հայաստանի հետ, սակայն միշտ շեշտել է, որ հայ-թուրքական հարաբերությունների կարգավորումըւ մեծապես կախված է հայ-ադրբեջանական հարաբերությունների կարգավորումից։ Այսինքն՝ փաստացի ստացվում է, որ նախապայմանն Ադրբեջանի՝ այդ կարգավորմանը համաձայնելն է։
Պարզ ասած՝ Թուրքիան ասում է այն, ինչ Հայաստանը տարիներ շարունակ ասում էր Արցախի մասով, այն է՝ Հայաստանը հայտարարում էր, որ պատրաստ է ընդունել հայ-թուրքական կարգավորման ցանկացած տարբերակ, եթե այն ընդունելի լինի Արցախի համար։ Այժմ նույնն ասում է Թուրքիան՝ շեշտելով, որ պատրաստ է հայ-թուրքական հարաբերությունների կարգավորման ցանկացած տարբերակի, եթե այդ տարբերակին հավանություն տա Ադրբեջանը։ Հետևաբար ոչ մի կերպ չի կարելի ասել, որ սա հարաբերությունների կարգավորում է առանց նախապայմանների»,- ասաց մեր զրուցակիցը։
Արմեն Բաղդասարյանի խոսքով՝ բնական է, որ միջազգային բոլոր հարթակներում Թուրքիան հայտարարում է Հայաստանի հետ առանց նախապայմանների հարաբերություններ կառուցելու պատրաստակամության մասին, մինչդեռ խորքային առումով տրամաբանորեն հակառակին է գնում։
«Դիվանագիտությունը հենց դա է։ Դիվանագիտությունը հենց այդպես է աշխատում, դրա համար էլ ասում են, որ լեզուն դիվանագետին տրված է ճշմարտությունը թաքցնելու համար»,- նշեց քաղաքագետը։
Անդրադառնալով տեղեկություններին, որ ԱՄՆ պետքարտուղար Էնթոնի Բլինքենը վաղը Նյու Յորքում կարող է հանդիպել Ադրբեջանի և Հայաստանի ԱԳ նախարարների հետ՝ «առաջ մղելու այն, ինչը համարվում է խաղաղության բանակցությունների «վերջնական փուլ», Արմեն Բաղդասարյանը շեշտեց՝ խաղաղության պայմանագրի ստորագրում առաջիկայում ակնկալել պետք չէ։
«Գուցե տեսականորեն հնարավոր է ինչ-որ փաստաթուղթ նախաստորագրել, բայց դա, բնականաբար, խաղաղության չի հանգեցնելու։ Ընդ որում, պետք է հաշվի առնել, որ թեև ՀՀ իշխանությունները շեշտադրում են, որ պատրաստ են շուտափույթ փաստաթուղթ ստորագրել, սակայն չմոռանանք, որ ամիսներ առաջ Ալիևն ինքն էր պատրաստակամություն հայտնում մինչև COP 29-ը ինչ-որ փաստաթուղթ նախաստորագրել։ Ադրբեջանին դա պետք էր իմիջի համար, ՀՀ իշխանություններն էլ ձևացնում են, թե իբր այդ փաստաթուղթը խաղաղություն կբերի, բայց իրականում խաղաղություն հաստատվում է ոչ թե ինչ-որ փաստաթուղթ ստորագրելով, այլ ուժերի հավասարակշռության դեպքում»,- ամփոփեց Արմեն Բաղդասարյանը։
