Որքան էլ ՀՀ իշխանությունները հավաստիացնեն, որ այսպես կոչված «Զանգեզուրի միջանցքը» կարմիր գիծ է, և բացառված է, որ Ադրբեջանի նախագահի հետ հանդիպումներում նման հարց քննարկվի, ակնհայտ է, որ այդ հարցը քննարկվելու է, ավելին՝ գուցե արդեն քննարկվում է։ Azg.am-ի թղթակցի հետ զրույցում նման տեսակետ հայտնեց քաղաքագետ Արմեն Բաղդասարյանը՝ մեկնաբանելով ՀՀ փոխվարչապետ Մհեր Գրիգորյանի այն հավաստիացումը, որ Հայաստանը միշտ պատրաստ է խոսել տրանսպորտային հաղորդակցության մասին, բայց միջանցքների մասին՝ ոչ։
«Կարծում եմ՝ Հայաստանի և Ադրբեջանի իշխանությունները ցանկանում են հասնել մի տարբերակի, որ կարողանան իրենց դեմքերը փրկել։ Օրինակ՝ ՀՀ էկոնոմիկայի նախարարն ակնարկեց, թե ինչ տարբերակ է քննարկվում։ Նա ասաց, որ այդ ճանապարհի վերահսկողությունը կարող է վստահվել որևէ միջազգային կազմակերպության։
Նա ասաց ֆրանսիական կամ շվեյցարական կազմակերպության, այսինքն՝ այդ կազմակերպությունը բեռները մի կետում ընդունի, մյուս կետում հանձնի, և այդպիսով Հայաստանը որևէ վերահսկողություն չի ունենա այդ ճանապարհի վրա, թեև դա կհամարվի Հայաստանի Հանրապետության ինքնիշխան տարածք»,- ասաց քաղաքագետը։
Արմեն Բաղդասարյանի խոսքով՝ սա կհամարվի փոխզիջումային տարբերակ, որը ՀՀ իշխանություններին հնարավորություն կտա ասելու՝ «Տեսա՞ք՝ մենք միջանցք չտրամադրեցինք», իսկ ադրբեջանական կողմն իր հերթին կհայտարարի՝ «Տեսա՞ք՝ մենք ստացանք ճանապարհը, և Հայաստանն այդ ճանապարհը բացարձակապես չի վերահսկում»։
«Այսինքն՝ ես վստահ եմ, որ այդպիսի միջազգային կամ միջանկյալ տարբերակների շուրջ բանակցություններ ընթանում են։ Չեմ կարծում, թե այս հարցում կարելի է վստահել ՀՀ իշխանություններին»,- ամփոփեց մեր զրուցակիցը։
Հիշեցնենք, որ ՀՀ փոխվարչապետ Մհեր Գրիգորյանը, խոսելով Ալիևի հայտարարած «Զանգեզուրի միջանցք»-ի մասին, լրագրողների հետ զրույցում ասել է՝ միշտ եղել է մի եզր, երբ միջանցքը շատ դեպքերում հայտարարվել է որպես տրանսպորտային միջանցք, ինչը միջազգային պրակտիկայում ընդունված տերմին է։
