Մենք ոչ մի զիջում չպետք է անենք Ադրբեջանին։ Եթե անենք, նրանք լկտի են, այլ զիջումներ էլ կպարտադրեն։ Մենք պետք է մինչև վերջ մնանաք և մեր հարցը լուծենք, որ մենք այստեղ ապրենք, իրենք՝ այնտեղ, իրար գործերի չխառնվենք, Azg.am-ի թղթակցի հետ զրույցում ասաց ստեփանակերտցի Վասիլի Ավետիսյանը՝ անդրադառնալով ադրբեջանցիների՝ կեղծ բնապահպանական նկատառումներով Լաչինի միջանցքն օրեր շարունակ փակ պահելու թեմային։
«20-30 տարի հետո առևտուր կլինի-բան կլինի, հնարավոր է, բայց մենք իրենց հետ երբեք չպետք է միասին ապրենք։ Դա իմ տեսակետն է։ Որպես հարևան կարող ենք ապրել, մեկ է՝ պետք է ապրենք, բայց միասին՝ ոչ»,- ասաց մեր զրուցակիցը։
Արցախցի տղամարդու խոսքով՝ ադրբեջանցիների վերջնական նպատակն այն է, որ Արցախում արցախցիներ չլինեն, իրենք գան և տիրանան արցախահայության տներին, ունեցվածքին և ստեղծած մյուս բարիքներրին։
«Դա իրենց քաղաքականությունն է՝ մեզ հանել Արցախից։ Հիմա Ադրբեջանն արցախցիների դիմադրողականությունն է ուզում փորձել։ Կրկնում եմ՝ եթե ինչ-որ հարցում զիջման գնանք, իրենք հիմա էլ կասեն՝ Ստեփանակերտում, ամբողջ Արցախում պետք է ներկայացուցչություններ ունենանք։ Այսօր մի պահանջ են դնում, վաղն ուրիշը կդնեն և այդպես շարունակ։ Դա շղթա է։ Նախիջևանը՝ ասածիս վկա։ Անցած դարասկզբին այնտեղի ազգաբնակչության 95 տոկոսը հայեր էին, իսկ հիմա՞։
Մենք պետք է պատմությունն իմանանք, քանի որ եթե պատմությունից դասեր չենք քաղում, կանգնում ենք փաստի առաջ։ Մենք պետք է լավ իմանանք, որ դրանց հետ մենակ հարևան-հարևան կարող ենք լինել՝ մաքսակետեր դրած, ոչ ավելին»,- նշեց Վասիլի Ավետիսյանը։
Անդրադառնալով Արցախում ստեղծված ճգնաժամային իրավիճակի շուրջ ՀՀ իշխանությունների վերաբերմունքին՝ մեր զրուցակիցը նկատեց՝ Հայաստանը վերջին երկու տարում շատ է թուլացել և միջազգային հարթակում ոչ մի բան չի անում՝ առաջ տանելու Արցախը շահը։
«Հայաստանը պետք է տնտեսապես հզորանա, որ կարողանա մեզ տեր ու տիրական կանգնել, հակառակ դեպքում 120 հազար արցախահայությունը չի կարող դիմագրավել 7-10 միլիոնանոց բնակչությանը։ Հայաստանը գոնե միջազգային ատյաններում պետք է տեր կանգնի Արցախին, իսկ այսօր այդպես չէ»,- ասաց Վասիլի Ավետիսյանը։
