99 տոկոսով համոզված եմ, որ ԱԺ նախագահ Ալեն Սիմոնյանը ստում է՝ հայտարարելով, թե փակ հանդիպման ժամանակ Ալիևն ընդունում է ՀՀ տարածքային ամբողջականությունը՝ թվային ձևակերպումով, Azg.am-ի թղթակցի հետ զրույցում ասաց քաղաքագետ Գագիկ Համբարյանը։
«Իհարկե, Ալեն Սիմոնյանը կեղծում է։ Ես, որպես ՀՀ քաղաքացի, ոչ միայն նպատակ չունեմ հավատալու կեղծարար, ստախոս իշխանության ներկայացուցչին, այլև հասկանում եմ՝ Ալեն Սիմոնյանն այն իշխանության ներկայացուցիչն է, որը 44-օրյա պատերազմի ամբողջ ընթացքը կեղծում և նենգափոխում էր՝ հասարակությանը մատուցելով սուտ տեղեկություններ։ Հետաքրքիր է՝ Ալեն Սիմոնյանը դարձել է Իլհամ Ալիևի մամուլի խոսնա՞կը, որ նրա անունից հայտարարություններ է տարածում։ Իլհամ Ալիևը թքած ունի Ալեն Սիմոնյանի վրա էլ, Նիկոլ Փաշինյանի վրա էլ, և եթե նա ցանկանա ճանաչել ՀՀ տարածքային ամբողջականությունը, կճանաչի՝ առանց վախենալու և բարձրաձայն»,- ասաց քաղաքագետը։
Գագիկ Համբարյանը հիշեցրեց՝ Ադրբեջանի նախագահը բազմիցս է հայտարարել, որ բացարձակ նպատակ չունի ՀՀ ինքնիշխան տարածքից հանելու 2020 թվականի նոյեմբերից հետո Հայաստան ներխուժած իր օկուպացիոն զորքերը։
«Ալեն Սիմոնյանի հայտարարությունն ընդամենը մանիպուլյատիվ կեղծիք է՝ սեփական ընտրազանգվածին խաբելու համար։ ԱԺ նախագահը բացահայտ ստում է, քանի որ Ադրբեջանի բռնապետի շուրթերից երբեք չենք լսել, որ ճանաչում է ՀՀ տարածքային ամբողջականությունը։ Այժմ շատ ծիծաղելի է, որ Սիմոնյանը կարող է իրեն թույլ տալ խոսելու Ալիևի անունից»,- ասաց Գագիկ Համբարյանը։
Հիշեցնենք, որ ԱԺ նախագահ Ալեն Սիմոնյանն այսօր հայտարարել էր՝ Ադրբեջանի նախագահ Իլհամ Ալիևը փակ հանդիպումների ժամանակ ասել է, որ ճանաչում է Հայաստանի տարածքային ամբողջականությունը։
«Չգիտեմ՝ ես դա ասելու իրավունք ունե՞մ, թե՞ չէ, կարծում եմ՝ ունեմ. փակ հանդիպման ժամանակ ինքը նույնպես ընդունում ու ընդունել է ՀՀ տարածքային ամբողջականությունը թվային ձևակերպումով»,- լրագրողների հետ զրույցում ասել էր նա։
