Մենք վերջնականապես կորցրեցինք Արցախը։ Ես այնքան մարդ եմ կորցրել, այնքան ընկեր եմ կորցրել, անորոշ վիճակում գտնվող այնքան մարդիկ կան, որ չգիտեմ՝ նույնիսկ ինչ ասեմ։ Ընդհանրապես ապրելու ցանկություն չի մնացել, Azg.am-ի թղթակցի հետ զրույցում ասաց լրագրող Նաիրի Հոխիկյանը։
«Հաջորդը Սյունիքն ենք կորցնելու, սպասեք։ Սպասեք, որ հաջորդը Սյունիքից տարհանում սկսվի»,- ասաց նա։
Նաիրի Հոխիկյանն իր զայրույթը հայտնեց ստեղծված իրավիճակում հայ ժողովրդի և ՀՀ իշխանությունների կեցվածքի վերաբերյալ։
«Ո՞ւմ մասին գնահատական հնչեցնել՝ հայ ժողովրդի՞, որը դավաճանեց ինքն իրեն, թե օրվա իշխանությունների։ Նրանք թուրք են, ես միշտ եմ դա ասել։ Սատանայի ծնունդներ են իրենք, դավաճաններ են։ Իրենցից ուրիշ բան սպասելի չէր, բայց որ ժողովուրդը ժողովուրդ չէ, բանակը բանակ չէ…
Զինվորականներ են, թող գնան հող ուտեն, մեռնեն, որ կանգնած այս կողմից նայում են՝ ոնց է Արցախը կոտորվում։ Գլխավոր շտաբի պետը ղարաբաղցի է. թող հող ուտի, մեռնի։ Նա կարող էր հրաման արձակել և զորքն ուղարկել Արցախ։ Այստեղ անելիք ուներ ԳՇ պետը, որը դավաճանեց իր ծննդավայրը, իր գերեզմանները, ամեն ինչ դավաճանեց։
Ո՞ւմ է պետք այն երկիրը, որը կանգնած նայում է, թե ոնց է իր բնակչությունը կոտորվում։ Ո՞ւմ է պետք այդ բանակը։ Եվ մենք պետք է ասենք՝ բանա՞կ ունենք։
Մենք բանակ չունենք, մենք պետություն էլ չունենք, մենք ընդամենը խայտառակված ամբոխ ենք՝ ուրիշ ոչինչ։ Մենք ապրելու, պետություն ունենալու իրավունք չունենք»,- ամփոփեց Նաիրի Հոխիկյանը։
Հիշեցնենք, որ ռուսական խաղաղապահ առաքելության հրամանատարության միջնորդությամբ պայմանավորվածություն է ձեռք բերվել ՌԴ խաղաղապահ զորախմբի տեղակայման գոտուց ՀՀ զինված ուժերի մնացած ստորաբաժանումների և զինծառայողների դուրսբերման և Լեռնային Ղարաբաղի Պաշտպանության բանակի ամբողջական լուծարման ու զինաթափման մասին։
Վաղը՝ սեպտեմբերի 21-ին, Եվլախում հանդիպում տեղի կունենա արցախահայության և Ադրբեջանի իշխանություների ներկայացուցիչների միջև։
