Արցախահայության նկատմամբ Ադրբեջանի ցեղասպան գործողությունները հետևանք են ՀՀ գործող իշխանությունների հանցավոր քաղաքականության՝ մասնավորապես նրանց կողմից արված քաղաքական մի շարք հայտարարությունների, որոնք որևէ իրավական հիմք չունեն։ Azg.am-ի թղթակցի հետ զրույցում այս մասին ասաց ՀՀ մարդու իրավունքների առաջին պաշտպան, «Ընդդեմ իրավական կամայականության» ՀԿ նախագահ Լարիսա Ալավերդյանը՝ շեշտելով հատկապես վերջին օրերի արդբերջանական ագրեսիայի ֆոնին Նիկոլ Փաշինյանի այն հայտարարությունը, որ Արցախի քաղաքացիական բնակչությանը սպառնացող ուղիղ վտանգ չկա։
«Անշուշտ, արցախահայության դեմ ցեղասպան գործողությունների գլխավոր մեղավորն Ադրբեջանն է, բայց, կրկնում եմ, ՀՀ օրվա իշխանությունների վտանգավոր, անգրագետ և միտումնավոր խեղաթյուրված հայտարարություններն Ադրբեջանի համար հիմք են ծառայում իր ցեղասպան գործողությունները բնութագրել որպես հակաահաբեկչական օպերացիա։
Այն դեպքում, երբ ՄԱԿ-ում Ադրբեջանի ԱԳ նախարարը մեջբերում է Նիկոլ Փաշինյանի խոսքերը, որ արցախահայությանը որևէ վտանգ չի սպառնում, ՀՀ արտգործնախարարը մեկ խոսք անգամ չի հնչեցնում, որ ԼՂ-ն միջազգային իրավունքի և ներպետական օրենսդրությամբ լեգիտիմ կայացած հանրապետություն է։ Նա մանկապարտեզային մակարդակով ելույթ է ունենում՝ վախենալով հիշեցնել, որ Լեռնային Ղարաբաղն ունի կարգավիճակ և մի քանի անգամ ինքնորոշվել է»,- ասաց Լարիսա Ալավերդյանը։
Իրավապաշտպանը շեշտեց՝ ՀՀ գործող իշխանությունների կողմից Արցախը բազմիցս Ադրբեջանի մաս ճանաչելու վերաբերյալ հայտարարություններն իրենց մեջ ծանր հանցագործության նշաններ են պարունակում։ Ադրբեջանի գործողությունները՝ ամեն գնով իր ինքնիշխանությունը տարածել Արցախի վրա հակասում են Ժնևյան բոլոր 4 կոնվենցիաներին։
«Խոսք է գնում մի փունջ հանցագործությունների մասին, Ադրբեջանը մարդասիրության դեմ հանցագործություններ է կատարում, շարունակ գործում ռազմական հանցագործություններ, մինչդեռ խաղաղ բնակչության դեմ նման գործողություններ չպետք է կատարվեն։ Ադրբեջանն արհամարհում է ՄԽ շրջանակներում ձեռք բերված և ոչ ոքի կողմից չչեղարկված համաձայնությունները»,- ասաց մեր զրուցակիցը։
Լարիսա Ալավերդյանը հիշեցրեց՝ արցախահայության նկատմամբ Ադրբեջանի գործողությունները ցեղասպանություն են որակում ոչ միայն հայ մասնագետները, այլև այնպիսի հեղինակավոր անձինք և կազմակերպություններ, ինչպիսիք են Միջազգային քրեական դատարանի նախկին գլխավոր դատախազ Լուիս Մորենո Օկամպոն, մի խումբ հանրահայտ ցեղասպանագետներ և իհարկե Ցեղասպանության կանխարգելման Լեմկինի ինստիտուտը։
«Եթե անգամ Ադրբեջանը ինչ-որ հարթակներում հայտարարում է, որ արցախահայերն իր քաղաքացիներն են, դա նրան իրավունք չի տալիս ցեղասպանություն գործել նրանց նկատմամբ»,- ամփոփեց իրավապաշտպանը։
