Հայաստանի վարչապետ Նիկոլ Փաշինյանի հայտարարությունները՝ Ռուսաստանի մասին, անընդունելի են. հայտնել է իր դժգոհությունը Մոսկվան։ Այս մասին ՏԱՍՍ-ին հայտնել է դիվանագիտական աղբյուրը։
Մոսկվան չափազանց դժգոհ է Հայաստանի ղեկավարության վերջին հրապարակային հայտարարություններից, այդ թվում՝ Հայաստանի վարչապետի հայտարարություններից իտալական La Repubblica թերթին տված հարցազրույցում և օգոստոսի 31-ին ՀՀ ԱԳՆ-ի մեկնաբանությունից։ Հայաստանի իշխանությունը սեփական սխալ հաշվարկների և սխալների պատասխանատվությունը Ռուսաստանի վրա է դնում․ ասել է աղբյուրը։
Մասնավորապես, Հայաստանի վարչապետը հայտարարեց տարածաշրջանից Ռուսաստանի հեռանալու հնարավորության մասին։ «Փաստորեն, նրանք փորձում են արհեստականորեն դուրս մղել Ռուսաստանին Հարավային Կովկասից՝ օգտագործելով Երևանը՝ որպես այդ նպատակին հասնելու միջոց։ Ռուսաստանը՝ որպես Հայաստանի ամենամոտ հարևան և բարեկամ, մտադիր չէ հեռանալ տարածաշրջանից։ Հայաստանը նույնպես չպետք է դառնա Արևմուտքի գործիքը»,- նշել է դիվանագիտական աղբյուրը։
Նա հավելել է, որ Ռուսաստանը Հայաստանի հետ հարաբերություններն անվտանգության և տնտեսության ոլորտներում դիտարկում է «ոչ թե որպես մի երկրի կախվածություն մյուսից, այլ որպես հավասար, փոխշահավետ և ապացուցված գործընկերություն»։
Նրա խոսքով՝ այն թեզը, թե «ղարաբաղյան հակամարտությունը երբեք տարածքային վեճ չի եղել Հայաստանի և Ադրբեջանի միջև», կեղծ է։ «Առճակատման արմատը նախկին Ադրբեջանական ԽՍՀ Լեռնային Ղարաբաղի Ինքնավար Մարզի կարգավիճակի հարցն է, մինչդեռ Երևանը երկար ժամանակ իր վերահսկողության տակ էր պահում ադրբեջանական տարածքի մի մասը»,- ասել է ՏԱՍՍ գործակալության զրուցակիցը։
Միաժամանակ նա նշել է, որ 2020 փվականի պատերազմին եթե չլիներ Ռուսաստանի և անձամբ նախագահ Վլադիմիր Պուտինի միջամտությունը, ռազմական գործողությունների հետևանքներն էլ ավելի ողբալի կլինեին:
Նա նկատի է ունեցել այն, որ պատերազմի մեկնարկից արդեն երեք շաբաթ անց ՌԴ նախագահը կոչ արեց Հայաստանի վարչապետին համաձայնել հրադադարին, որը կկանխի հետագա կորուստները։
