Հաագայի դատարանը քաղաքականացված դատարան է, և վերջնարդյունքը կախված է այն բանից, թե քաղաքական ինչպիսի որոշում կկայացնի այդ դատարանը, Azg.am-ի թղթակցի հետ զրույցում ասաց իրավապաշտպան Ավետիք Իշխանյանը՝ անդրադառնալով Հայաստանի՝ Լաչինի միջանցքն ապաշրջափակելու պահանջով ՄԱԿ-ի արդարադատության միջազգային դատարան դիմելու գործընթացին։
«Երկրորդ կարևոր կետը հետևյալն է. եթե դատարանը որոշի, որ Արցախը Հայաստանին կապող միակ ճանապարհը պետք է բացվի, արդյոք Ադրբեջանը կբացի։ Համոզված եմ, որ ոչ։ Իհարկե, հայանպաստ բանաձևը մեզ համար օգուտ կլինի, բայց Ադրբեջանի վրա որևէ ազդեցություն չի թողնի։
Եվ երրորդ, ինձ համար նվաստացուցիչ էր, որ ՄԱԿ-ի միջազգային դատարանում Հայաստանի Հանրապետության ներկայացուցիչ Եղիշե Կիրակոսյանն հայտարարեց՝ սա մեր վերջին հույսն է։ Սա խայտառակություն է և նվաստացում ողջ աշխարհի առջև, որ պետության վերջին հույսը դատարանն է»,- ասաց իրավապաշտպանը։
Ավետիք Իշխանյանը վերջում կրկին համոզմունք հայտնեց՝ Ադրբեջանը ինչպես չկատարեց ՄԻԵԴ-ի վճիռը, այնպես էլ չի կատարի ՄԱԿ-ի միջազգային դատարանի վճիռը։
Հիշեցնենք, որ դեռևս 2022 թվականի դեկտեմբերի 15-ին Մարդու իրավունքների եվրոպական դատարանը որոշում էր կայացրել Հայաստանի ներկայացրած միջանկյալ միջոցներ կիրառելու պահանջի վերաբերյալ:
Դատարանը որոշել էր Ադրբեջանին ժամանակ տրամադրել մինչև դեկտեմբերի 19-ը պատասխան ուղարկել Հայաստանի ներկայացրած պահանջի վերաբերյալ։
Հայաստանը ՄԻԵԴ էր դիմել Ադրբեջանի նկատմամբ միջանկյալ միջոցներ կիրառելու և Լաչինի միջանցքն ապաշրջափակել պարտադրելու պահանջով:
Հիշեցնենք նաև, որ ՄԱԿ-ի արդարադատության միջազգային դատարանում Հայաստանի ներկայացուցիչ Եղիշե Կիրակոսյանը ներկայացրել էր Հայաստանի միջանկյալ պահանջները Ադրբեջանի նկատմամբ։
Ռասայական խտրականության վերացման կոմիտեի վարույթի շրջանակներում Ադրբեջանի դեմ Հայաստանի ներկայացրած հայցի լսումների ժամանակ Եղիշե Կիրակոսյանը նշել էր, որ Հայաստանը խնդրում է դատարանին պարտադրել հետևյալ միջանկյալ միջոցները նախքան այս գործով վճիռ կայացնելը:
«Ադրբեջանը պետք է դադարեցնի իր կազմակերպումն ու օժանդակությունը, այսպես կոչված, բողոքների ցույցերին, որոնք խաթարում են ազատ տեղաշարժը Լաչինի միջանցքով՝ երկու ուղղությամբ: Ադրբեջանը պետք է երաշխավորի Լաչինի միջանցքով բոլոր անձանց, բեռների և տրանսպորտային միջոցների անխափան տեղաշարժը՝ երկու ուղղությամբ:
Ադրբեջանը անմիջապես պետք է լիովին վերականգնի և ձեռնպահ մնա խաթարելուց կամ խանգարելուց բնական գազի կամ այլ հանրային ծառայությունների մատակարարումը ԼՂ»,- ասել էր Կիրակոսյանը։
