Իրավիճակն Արցախում իսկապես շատ ծանր է, կարելի է ասել՝ կրիտիկական, որովհետև արցախցին լրիվ մեկուսացած է. արցախցին խեղադամահ է լինում։ Սա է իրավիճակը, Azg.am-ի թղթակցի հետ զրույցում ասաց ԱՀ նախագահի խորհրդական Դավիթ Բաբայանը՝ անդրադառնալով Լաչինի միջանցքով մարդկանց և մարդասիրական օգնության տեղափոխման արգելքին։
Մեր զրուցակցի խոսքով՝ այս և նմանօրինակ այլ իրավիճակներում հայերը սովոր են այլոց մեղադրել, սակայն ինքը փորձում է հեռու մնալ այդ մոտեցումից։
«Նույնիսկ Ադրբեջանից չպետք է նեղանանք։ Այո՛, այսօր ադրբեջանցիներն են փակել Լաչինի միջանցքը, բայց պետք է խոստովանենք, որ նրանք մեր ամենաազնիվ թշնամիներն են։ Ադրբեջանը երբեք չի թաքցրել իր բուն նպատակը, այնպես որ սխալ կլինի նրանից նեղանալ։
Չպետք է նեղանանք նաև աշխարհի մյուս երկրներից, որովհետև առաջին հերթին ինքներս մեզ պետք է այնպես դրսևորենք, որ կարողանանք դիմակայել տարբեր մարտահրավերների։ Առաջին հերթին մենք ինքներս պետք է ավելի կարգապահ, հայրենասեր և միասնական լինենք, որպեսզի կարողանանք այս իրավիճակից դուրս գալ»,- ասաց Դավիթ Բաբայանը։
ԱՀ նախագահի խորհրդականի համոզմամբ՝ այսօր արցախակենտրոնության պակասի խնդիր կա։
«Ինչքան կարողանանք, այդքան էլ պետք է դիմադրենք, այլ տարբերակ չունենք։ Մյուս կողմից՝ խանութներում դատարկություն է, վիճակը շատ բարդ է. դեղերի, ուտելիքի հետ կապված լրջագույն խնդիրներ կան, շատ խանութներ ուղղակի փակ են»,- ասաց արցախցի պաշտոնյան։
Դավիթ Բաբայանը միաժամանակ համոզմունք հայտնեց՝ այն, ինչ այսօր կատարվում է Արցախում, ամբողջ հայ ժողովրդին ստուգող յուրօրինակ ռենտգեն է, լաբորատոր թեստ, որը պետք է պարզի ՝ արդյոք պահպանվել է հայ ժողովրդի բարոյահոգաբանական դեմքը, թե մուտացիայի է ենթարկվել։
Հիշեցնենք, որ արդեն 7-րդ օր է, ինչ Արցախի 120 հազար քաղաքացի գտնվում է տոտալ մեկուսացման մեջ են՝ առանց որևէ մատակարարման և տեղաշարժի։ Լաչինի միջանցքում Ադրբեջանն արգելել է անգամ ռուս խաղաղապահների երթևեկը։
Հունիսի 15-ին Կարմիր խաչի միջազգային կոմիտեի կողմից 25 բուժառու և նրանց հարազատներն պետք է տեղափոխվեին Արցախից Հայաստան, սակայն միջանցքում գործող ապօրինի ադրբեջանական անցակետում արգելվել էր մեքենաների հետագա տեղաշարժը՝ նրանց ստիպելով վերադառնալ Ստեփանակերտ:
