Ադրբեջանաիսրայելական տանդեմը շատ վաղուց է ձևավորված, և դրա ամենաակնառու ապացույցը դեռևս 2016 թվականի քառօրյա պատերազմն էր, երբ Իսրայելը չփորձեց անգամ թաքցնել, որ ակտիվորեն մասնակցել է ռազմական գործողություններին։ Իսրայելի կողմից նման ակտիվ ներգրավում տեղի ունեցավ նաև 2020 թվականի 44-օրյա պատերազմի ժամանակ, Azg.am-ի թղթակցի հետ զրույցում ասաց քաղաքագետ Գագիկ Համբարյանը՝ անդրադառնալով Բաքվի և Թել Ավիվի միջև ռազմաքաղաքական կոալիցիայի ձևավորման հանգամանքին։
Նրա խոսքով՝ Ֆիզուլիում և Զանգելանում օդանավակայաններն Ադրբեջանի, առավել կոնկրետ՝ ադրբեջանաիսրայելական տանդեմի կողմից հատուկ են կառուցվել՝ որպես պլացդարմ՝ Իրանին հարվածելու համար։
«Երկար տարիներ համագործակցելով Իսրայելի հետ՝ Ադրբեջանը չէր հանդգնում բացահայտ ցույց տալ իր սերը հրեական պետության հանդեպ և Իսրայելում դեսպանատուն բացել։
Այժմ հաշվի առնելով Ադրբեջանի և Իրանի միջև հարաբերությունների խոր ճգնաժամը՝ Ադրբեջանը Թել Ավիվում դեսպանատուն է բացում»,- նշեց Գագիկ Համբարյանը։
Անդրադառնալով տեղեկությանը, որ ՀՀ անվտանգության խորհրդի քարտուղար Արմեն Գրիգորյանն ապրիլի 9-ին Թեհրանում հանդիպելու է իրանցի գործընկերոջը՝ քաղաքագետը շեշտեց՝ ինքը բացարձակ չի հավատում, որ ՀՀ իշխանություններն իրանամետ դիրքորոշում ունեն, ավելին՝ նրանք ի սկզբանե հակաիրանական դիրքորոշում են ունեցել։
«Պետք չէ մոռանալ Իրանի վերաբերյալ ՀՀ գործող իշխանությունների արտահայտությունները. մասնավորապես, ոչ վաղ անցյալում ՔՊ պատգամավորներից մեկն ամբիոնից հայտարարեց, թե Իրանը տոտալիտար, ոչ ժողովրդավարական երկիր է։
Այժմ, ենթադրաբար, Արմեն Գրիգորյանին Իրանում հայտնելու են այն կարմիր գիծը, որից հետո պաշտոնական Թեհրանը որոշ հարցերի վերաբերյալ արհամարհելու է Հայաստանի կարծիքը, և ինքն է քայլեր ձեռնարկելու։
Չեմ բացառում, որ Իրանը կոնկրետ կարմիր գիծ դնի ՀՀ առջև՝ նշելով, որ այլևս չի հանդուրժելու Սյունիքով Ադրբեջանին միջանցք տրամադրելը կամ Ադրբեջանի կողմից ՀՀ տարածքների օկուպացումը։ Իրանն իր զորքերը կմտցնի Սյունիք և դրանով Հայաստանը կբաժանվի երկու մասին՝ հյուսիսը կհայտնվի ռուսական, հարավն՝ իրականական վերահսկողության տակ»,- ասաց Գագիկ Համբարյանը։
Հիշեցնենք, որ Հայաստանի Հանրապետության անվտանգության խորհրդի քարտուղար Արմեն Գրիգորյանն ապրիլի 9-ին աշխատանքային այցով կգտնվի Թեհրանում:
Արմեն Գրիգորյանը հանդիպում կունենա Իրանի Իսլամական Հանրապետության Ազգային անվտանգության գերագույն խորհրդի քարտուղար Ալի Շամխանիի հետ:
Հիշեցնենք նաև, որ Ադրբեջանի ԱԳ նախարար Ջեյհուն Բայրամովի՝ մարտի 29-ի Թել Ավիվ այցելության ընթացքում տեղի է ունեցել Ադրբեջանի դեսպանության բացման պաշտոնական արարողությունը:Իսրայելի ԱԳ նախարար Էլի Քոհենը ադրբեջանցի իր գործընկերոջ Ջեյհուն Բայրամովի այցը Թել Ավիվ պատմական է անվանել և նշել, որ Իսրայելին ու Ադրբեջանին ուղղված սպառնալիքները, ինչպես նաև իրանական սպառնալիքների մասին երկու երկրների պատկերացումներն ընդհանուր են:
