ՀՀ իշխանությունների ստախոսությունը պետք է ոչ թե կոնկրետ այս դեպքի հետ կապել, այլ հասկանալ, որ նրանք վաղուց են ստախոս դարձել, Azg.am-ի թղթակցի հետ զրույցում ասաց քաղաքագետ Երվանդ Բոզոյանը՝ անդրադառնալով Աշոտ Փաշինյանի տարածած հայտարարությանը, որով վերջինս հերքում է իր վրա հարձակման մասին լուրերը։
Հիշեցնենք, որ ՀՀ վարաչեպտի որդու վրա հարձակման մասին ֆեյսբուքյան գրառմամբ երեկ հայտնել էր ԱԺ նախագահ Ալեն Սիմոնյանը։
«Ամոթ է, որ մինչև այսօր նրանք դեռ իշխանության են, և անընդհատ զարմանալ նրանց ստախոսության փաստի վերաբերյալ չարժե։ Ի՞նչ է, պետք է ՀՀ գործող իշխանությունների ստախոսությունը կոնկրետ այս դեպքի վերաբերյա՞լ արձանագրեինք։
Այս մարդիկ այս 4-5 տարվա ընթացքում այնքան են սուտ խոսել, որ պարզապես ամոթ է այդքանից հետո խոսել ինչ-որ նոր ստի մասին։ Հանրությունն ավելի լուրջ, ավելի վտանգավոր, ավելի խիստ խնդիրների շուրջ պետք է գնահատակն հնչեցնի, և այս իշխանությունը վաղուց իր տեղում չպետք է լիներ։
Հայաստանը շատ ավելի վտանագավոր խնդիրների առջև է կանգնած, և իշխանությունը շատ ավելի լուրջ խնդիրների վերաբերյալ է խաբել և խաբում, որ այդ ամենը թողած՝ սկսենք մասնավոր դեպքի վերաբերյալ խոսել»,- ասաց Երվանդ Բոզոյանը։
Հիշեցնենք, որ ավելի վաղ հրապարակվել է Աշոտ Փաշինյանի հայտարարությունը, որում ասված է.
«Իմ հանդեպ որևէ քաղաքական կամ այլ բնույթի հարձակում տեղի չի ունեցել:
Ցավոք, ստիպված եմ ինքս հերքել իմ մասին պտտվող ստահոդ տեղեկությունը: Ինչ վերաբերում է «տեղեկության» տարածմանը, կարծում եմ, ամենազարմանալին այն է, թե ով ում է ցիտում: Իսկ թե ինչու՝ ինձ նույնիսկ հետաքրքիր էլ չէ: Լավագույն մաղթանքներս բոլորին»։
