ԱԺ առողջապահության հարցերի մշտական հանձնաժողովի նիստում այսօր քննարկվեց «Բնակչության բժշկական օգնության և սպասարկման մասին» օրենքում փոփոխություններ կատարալու մասին նախագիծը։
Ինչպես ասաց Առողջապահության նախարարի տեղակալ Արտակ Ջումայանը, առաջարկվող փոփոխություններով հնարավոր կլինի մշակելու բժշկական արտադրատեսակների գրանցման ներպետական ազգային կարգ, ինչը թույլ կտա մինչև ԵԱՏՄ կարգերի՝ ամբողջական անցման վերջնաժամկետը՝ 2025 թվականի դեկտեմբերի 31-ը, զուգահեռ գործածել նաև ազգային կարգավորումը։
Նոր խմբագրությամբ առաջարկվում է նաև լիազոր մարմնի կողմից սահմանված դեպքերում պետության կարիքների համար չգրանցված բժշկական արտադրատեսակների ներմուծման մեխանիզմ։
Ինչպես իր հերթին նկատեց ԱԺ առողջապահության հարցերի մշտական հանձնաժողովի նախագահ Նարեկ Զեյնալյանը, իր համար անհասկանալի է «պետության կարիքների համար ներմուծվող բժշկական արտադրատեսակներ» արտահայտությունը։
«Այս արտահայտությունը նախարարությանն ավելի լայն հնարավորություն է տալիս գնալ որոշակի գործողությունների, որոնք հետագայում կարող են խնդրահարույց լինել։ Կարծում եմ՝ շրջանակները պետք է նեղացնենք։
Ըստ էության՝ նախարարին միանձնյա հնարավորություն ենք տալիս ցանկացած արտադրատեսակ թույլ տալ ներմուծել՝ ուղղակի հղում տալով այս կետին։ Ինձ համար այս մասը մի քիչ խնդրահարույց է, առաջարկում եմ հստակեցնել, սկզբունքներ սահմանել, թե որ դեպքերում կարող է այդպիսի թույլատրություն լինել»,- ասաց Զեյնալյանը։
Հանձնաժողովի նախագահն Արտակ Ջումայանին առաջարկեց մեկ նիստ հետաձգել, որի ընթացքում նախարարությունը կհասցնի շտկել հնչած դիտարկումները, և արդեն հաջորդ նիստին հարցը կրկին կընդգրկվի օրակարգ։
Արտակ Ջումայան լրիվ ընդունելի որակեց այս առաջարկը։
Որոշվեց նախագիծը հետաձգել երկու ամիս ժամկետով։
