44-օրյա պատերազմում զոհված զինծառայողների հարազատները բողոքի ակցիա են իրականացրել գլխավոր դատախազության դիմաց։ Նրանք պահանջում էին վարչապետ Փաշինյանին պետական դավաճան ճանաչելու մասին գործը տեղափոխել ԱԱԾ, որովհետև ամիսներ շարունակ մի կառույցից մյուսի վրա գցելով, ծնողերին տանել-բերելով՝ դատախազությունն ուղղակի ժամանակ է ձգում։ Ծնողները Քննչական կոմիտեին չեն վստահում ու կարծում են, որ դավաճանների հայտնաբերմամբ զբաղվող ԱԱԾ-ն միգուցե հետաքննի նաև պատերազմական հանցագործությունների դեպքերը, թե ինչու են 2020-ի հունիսից բարձրակարգ զինվորականները փոխարինվել անփորձ կադրերով, ինչու, իմանալով, որ Ադրբեջանը պատերազմ է սկսելու, զորամասին տեղյակ չի պահվել, բոլորը քնած՝ թշնամին հարձակվել է։
Սպանված տղաների հարազատներից յուրաքանչյուրը փաստեր ունի, որ պատերազմի ժամանակ կատարվել են հանցագործություններ, նրանք արդար դատավարություն են պահանջում։ Պահանջում են, որ վարչապետ Փաշինյանի նկատմամբ՝ որպես պետական դավաճանի, քննություն սկսվի։
4 անգամ միջնորդություն է ներկայացվել, որպեսզի դատախազությունը գործը ՔԿ-ից տեղափոխի ԱԱԾ, որովհետև Արգիշտի Քյարամյանին հանդիպելուց հետո ծնողները հասկացել են, որ նրա անաչառությանն ապավինել չեն կարող։ Իսկ ինչու դատախազ Արթուր Դավթյանը գործի քննությունը չի հանձնում ԱԱԾ-ին, ծնողներն այդ հարցի պատասխանն էին ուզում ստանալ։ Ժամեր շարունակ սպասելով դատախազության դիմաց՝ վերջապես արձագանք ստացվեց, որ 10 հոգի կարող է բարձրանալ Արթուր Դավթյանի մոտ։ Կես ժամ հետո սպանված տղաների հարազատները վերադարձան ու տեղեկացրին, որ գլխավոր դատախազ Արթուր դավթյանը նրանց ասել է, որ մեկ օրից կպատասխանի՝ գործը ՔԿ-ից տեղափոխում է ԱԱԾ, թե ոչ։
Ծնողներն ասել են.«Երկու ամիս է Ձեզ մնացել, պարոն դատախազ, 4 տարվա անգործության մեջ գոնե մի լուսավոր բան արեք, նոր գնացեք, ծնողների պահանջը կատարեք։ նա էլ ասաց՝ դե կտեսնեք՝ կանե՞մ, թե չեմ անի»։
