Եթե Հայաստանը հստակ որոշում ունենար՝ դուրս գալու ՀԱՊԿ-ից, ապա վաղուց արդեն դուրս եկած կլիներ, սակայն Արևմուտքը հստակ երաշխիքներ չի տրամադրում. քաղաքագետ

Անակնկալ որևէ  բան չկա, որ ՀՀ պաշտպանության նախարարը չի մեկնել Մինսկ և չի մասնակցում ՀԱՊԿ պաշտպանության նախարարների խորհրդի նիստին. փաստացի արդեն բավականին ժամանակ է՝ հայկական կողմը սառեցրել է կառույցի աշխատանքներին իր մասկացությունը, և չի բացառվում, որ ինչ-որ պահի առհասարակ դուրս գա ՀԱՊԿ-ից։ Azg.am-ի թղթակցի հետ զրույցում նման տեսակետ հայտնեց քաղաքագետ Դավիթ Հարությունովը։

«Ստեղծված իրավիճակում երկու տարբերակ կա. մեկն այն է, որ Հայաստանն իր այս պահվածքով մեսիջ է հղում Արևմուտքին, որ պատրաստ է փոխգործակցություն ծավալել։ Երկրորդ՝ Հայաստանն իր քննադատություններով փորձում է ինչ-որ կերպ ազդել ՀԱՊԿ-ի և հատկապես Ռուսաստանի վրա։

Բայց քննադատությունն այդքան էլ արդյունավետ չէ, որովհետև տեսնում ենք, որ ո՛չ Արևմուտքի դիրքորոշումն է փոխվում, ո՛չ էլ ռուսական կողմի, որովհետև երկու դեպքում էլ օբյեկտիվ պատճառներ կան»,- ասաց մեր զրուցակիցը։
Նրա խոսքով՝ չի կարելի բացառել, որ ինչ-որ փուլում Հայաստանը կարող է դուրս գալ ՀԱՊԿ կազմից, սակայն առայժմ նման քայլի չի գնում, քանի որ ռեալ այլընտրանքը բացակայում է։

«Գործնականում, եթե հնարավոր լիներ դեպի Արևմուտք կողմնորոշվել, ՀԱՊԿ-ից Հայաստանի դուրս գալը տրամաբանական կլիներ, բայց հասկանալի է, որ Արևմուտքն այդ մակարդակի երաշխիքներ պատրաստ չէ տրամադրել կամ մեր տարածաշրջանում լուրջ պարտավորություններ ստանձնել. Արևմուտքի հիմնական ջանքերն այժմ կենտրոնացած են Ուկրաինայի վրա։ Այդ մասին բացահայտ ակնարկվում է Հայաստանին։ Մյուս կողմից, եթե Հայաստանը դուրս գա ՀԱՊԿ-ից, կկորցնի Ռուսաստանի վրա ազդելու լծակը։ Կառույցը լքելը կազդի նաև ՌԴ-ի հետ հարաբերությունների վրա։

Իհարկե, եղել են ժամանակներ, երբ ՀԱՊԿ անդամ երկները դուրս են եկել այդ կառույցից, և դա շատ լուրջ հետևանքներ չի ունեցել, բայց այժմ դա կարևող է ընկալվել որպես հարված ՌԴ-ի և ՀԱՊԿ-ի դիրքերին»,-ասաց Դավիթ Հարությունովը՝ շեշտելով, որ ՀԱՊԿ-ից դուրս գալով՝ Հայաստանը գործնականում ոչինչ չի շահի՝ ավելին, կվատթարացնի ռազմավարական դաշնակցի հետ հարաբերությունները։

Քաղաքագետը շեշտեց՝ եթե Հայաստանը հստակ որոշում ունենար՝ դուրս գալու ՀԱՊԿ-ից, ապա վաղուց արդեն դուրս եկած կլիներ։

Հիշեցնենք, որ ՀՀ պաշտպանության նախարար Սուրեն Պապիկյանը չի մեկնել Մինսկ և չի մասնակցում ՀԱՊԿ պաշտպանության նախարարների խորհրդի նիստին։

ՌԴ պաշտպանության նախարար Սերգեյ Շոյգուն էլ հայտարարել է, որ Հայաստանի մասնակցությունը ՀԱՊԿ-ի շրջանակում համատեղ օպերատիվ և մարտական ​​պատրաստության աշխատանքներում կարևոր է։