Գյուղերը չենք տալիս. սկսում ենք պետական սահմանի իրավական ձևավորման գործընթաց. Անդրանիկ Քոչարյան

«Խոսում են բաներ, որը չի համապատասխանում իրականությանը։ Գնում են, ծառերի տակ նկարվում են, ասում են՝ Հայաստանը գյուղերը տվեց։ Գյուղերը չենք տալիս, անհնար է, գյուղ տվողը դառնում է հանցագործ։ Մենք սկսում ենք պետական սահմանի իրավական ձևավորման գործընթաց»,- ԱԺ-ում լրագրողների հետ զրույցում ասաց ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։

Իշխանական պատգամավորը շատ հեշտ է պատկերացնում ապագան՝ հենց որ Հայաստանի և Ադրբեջանի սահմանագիծը հաստատվի, պաշտպանությունը հեշտէ  դառնալու՝  կանգնելու են սահմանապահ զորքերը, որոնք էլ կրելու են դրա պատասխանատվությունը։

Հարցին՝ ի վերջո, Տավուշի մարզի՞ց է սկսվելու սահմանազատումը, պատասխանեց. «Պարզ է չէ՞, որ երբ սկսել ենք այդ հատվածից, նշանակում է՝ ինչ-որ մի տեղ, ինչ-որ փակ սենյակում պետական անվտանգության ինչ-որ մարմին նայել է, թե որտեղ է ավելի նպատակահարմար ու գտել է այդպես, դա կոչվում է Գլխավոր շտաբ»։