Միանգամայն անընդունելի և ցանկացած մարդու համար խիստ ցավալի է, որ հայ մարդիկ հայտնվում են Բաքվի բանտերում, բայց պետք է հասկանալ, թե այս հարցում որն է Ադրբեջանի հիմնական նպատակը։ Azg.am-ի թղթակցի հետ զրույցում այս մասին ասաց քաղաքագետ Արմեն Բաղդասարյանը՝ անդրադառնալով ԱՀ նախկին երեք ղեկավարների ձերբակալության փաստին։
«Ադրբեջանի հիմնական նպատակն ակնհայտորեն հրապարակային, մեծ շոու-դատավարություն կազմակերպելն է՝ օգտագործելով Արցախի Հանրապետության երեք նախագահների՝ Արկադի Ղուկասյանի, Բակո Սահակյանի և Արայիկ Հարությունյանի ցուցմունքները։
Բաքվի գերնպատակն է ԼՂ հակամարտության, Արցախում իր կողմից իրականացված ցեղասպան քաղաքականության և բռնի տեղահանումների մեղքը բարդել բացառապես հայկական կողմի վրա, իսկ հետագայում նաև Հայաստանից փոխհատուցում պահանջել»,- ասաց մեր զրուցակիցը։
Անդրադառնալով ՌԴ արտգործնախարարության պաշտոնական ներկայացուցիչ Մարիա Զախարովայի այն հայտարարությանը, որ Մոսկվան Արցախի նախկին ղեկավարության ներկայացուցիչների ազատ արձակման և Հայաստան վերադարձնելու հարցում օգնության խնդրանք չի ստացել՝ Արմեն Բաղդասարյանը նկատեց՝ ցանկության դեպքում Ռուսաստանը կարող էր կանխել վերոնշյալ երեք անձանց ձերբակալումը։
«Բայց մեծ հաշվով դա իրենց շահերից չի բխում, որովհետև եթե այդպիսի դատավարություն լինի, և ամբողջ մեղքը բարդվի հայկական կողմի վրա, այդպիսով Մոսկվան կարող է արդարանալ և փրկել իր դեմքը՝ Արցախում կատարված ողբերգության գցելով Հայաստանի վրա։
Կարծում եմ՝ առաջին հերթին սա է պատճառը, որ Ռուսաստանը գործնական քայլեր չի ձեռնարկել՝ կանխելու վերոնշյալ երեք անձանց ձերբակալությունները, իսկ առաջիկայում էլ հազիվ թե ձեռնարկի՝ նրանց Բաքվի գերությունից ազատելու»,- ամփոփեց քաղաքագետը։
