«Հայաստանի եւ Ադրբեջանի միջեւ խաղաղության համաձայնագրի նախագիծը համաձայնեցված է եւ սպասում է ստորագրման: Իմ հանձնարարականը ՀՀ ՊՆ-ին հստակ է՝ հրադադարի ռեժիմի ոչ մի խախտում չանել: Հայաստանը գնում է խաղաղության եւ ոչ թե պատերազմի»: Մարտի 19-ին վարչապետ Փաշինյանի սույն գրառումը լեզվատրամաբանական քննության է ենթարկել «գերմանաադրբեջանական խորհուրդ» լոբբիստական խումբը, որ X-ի հարթակում Բեռլինում Ադրբեջանի դեսպան Աղաեւի ստվերային ուղեղն է, ուստի ադրբեջանցի դիվանագետն ինչ ուզում է, որ գերմանական փաթեթավորմամբ մատուցվի, խորհրդին է դիմում՝ անընդհատ, ժամեր շարունակ վերահրապարակում այս կառույցի գրառումները: ՀՀ վարչապետի գրառմանն արձագանքելով «գերմանաադրբեջանական խորհուրդը» պատասխանում է՝ «Ինչու՞ է հայկական զինուժը շարունակում գնդակոծել ադրբեջանական դիրքերը: Հնարավոր է երկու բան՝ կա՛մ դուք միտումնավոր խաթարում եք միջազգային հանրության ընկալումը, կա՛մ ձեր բանակը հակասում է ձեր իշխանությանը՝ հերթական պատերազմի մեջ ներքաշելով տարածաշրջանը: Երկուսն էլ ընդունելի չեն»: Այն, որ ԵՄ դիտորդներն արձանագրում են ՀՀ-Ադրբեջան սահմանի իրողությունները, եւ հրադադարը խախտելու փաստ չկա, տեղյակ են ոչ միայն երկու երկրները, այլեւ՝ Բրյուսելը, որ զեկույցը ստանում է, բայց չի հրապարակում: Մարտի 17-ին գերմանացի վերլուծաբան Զիլվիա Շթյոբերը նկատել էր տվել, որ ԵՄ դիտորդական առաքելության զեկույցը հաստատում է, որ սահմանի երկայնքով խաղաղ է, անսովոր ակտիվություն չկա, եւ սա է պատճառը, որ Ադրբեջանը ցանկանում է դիտորդների՝ վկաների հեռացումը:
ԱՆԱՀԻՏ ՀՈՎՍԵՓՅԱՆ
Գերմանիա
