Արդնե 10-րդ օրն է՝ Արցախը և արցախահայությունը շրջափակման մեջ են, սակայն հնչող արձագանքները ոչինչ չեն փոխի, քանի դեռ կոշտ քայլեր չեն արվել։ Աշխարհը ոչ թե պետք է դատապարտի Ադրբեջանին, այլ վճռական քայլեր ձեռնարկի։ Նույնը պետք է անի նաև Հայաստանի Հանրապետությունը, Azg.am-ի թղթակցի հետ զրույցում ասաց Արցախի սոցիալական զարգացման ծրագրերի հիմնադրամի տնօրեն Սոֆյա Հովսեփյանը։
«Ադրբեջանն ապացուցում է, որ հնարավոր չէ իր հետ խաղաղ պայմաններում ապրել, և ամեն օր կարող է այնպես լինել, որ արցախահայությունը կենսական կարևոր խնդիրների առջև կանգնի՝ մինչև անգամ կյանքի վտանգի առջև։ Սրանից ելնելով՝ կարելի է միանշանակ ասել, որ Ադրբեջանի կողքին խաղաղ ապրելն ուղղակի անհնար է»,- ասաց մեր զրուցակիցը։
Սոֆյա Հովսեփյանի համոզմամբ՝ ստեղծված իրավիճակում Հայաստանը պետք է ճանաչի Արցախի ինքնավարությունը, և այստեղ որևէ կերպ արցախահայության իրավունքների մասին չպետք է խոսել, այլ պետք է խոսել բացառապես ինքնավարության, անկախության և Արցախին կարգավիճակ տալու մասին։
«Դա կլինի միակ տարբերակը, որտեղ Արցախը ինքն իր տերն ու տնօրենը կլինի և ինքնուրույն կորոշի՝ խաղաղապահների առկայությունը լինելո՞ւ է անվտանգության երաշխիք, թե ոչ։ Գուցե այլ կառույցներից խաղաղպահներ խնդրի և հավելի արդեն եղած ուժերին։ Սա արդեն կլինի պետության քայլ-գործողություն, բայց այս պահին դեռ Արցախը փաստացի կախված է Հայաստանի քմահաճույքից։
Այս իրավիճակում Արցախին մենակ թողնել, որպեսզի նա միայնակ լուծում գտնի, անընդունելի է։ Առաջին պահանջն, այո՛, պետք է լինի ՀՀ իշխանությունից, որովհետև առկա իրավիճակը նրանց անգործության և թողտվության հետևանքն է։
Երկրորդ պահանջը պետք է ներկայացնել Ռուսաստանին, որը նոյեմբերի 9-ի համաձայնագրով պարտավորություն ունի խաղաղապահների միջոցով ապահովվել արցախահայության անվտանգությունը։ Փաստացի այսօր 120 հազար մարդ վտանգված ապրում է Արցախի Հանրապետության տարածքում»,- ասաց Սոֆյա Հովսեփյանը։
Մեր զրուցակցի խոսքով՝ Արցախում հումանիտար ճգնաժամը խորանում է, և նորածնային տարիքի բազմաթիվ երեխաների ընտանիքների համար ավելի ու ավելի դժվար է դառնում արհեստական կաթնախառնուրդ հայթայթել։
«ՀՀ իշխանությունը պարտավոր է շատ արագ լուծել այս և նմանօրինակ մյուս հարցերը։ ՀՀ ներկայացուցիչը պարտավոր է ամեն վայրկյան, երեք րոպեն մեկ աշխարհին տեղեկացնել, թե ինչ վտանգաներ կան այս պահին Արցախում, իսկ իրենց միակ խոսույթն այսօր սննդի պակասի մասին է։ Սա չէ խնդիրը, խնդիրն այն է, կրկնում եմ, որ դեղորայքն ու նորածինների արհեստական կաթնախառնուրդները սպառվել են։ Արցախում` հիվանդանոցում, արդեն երկրորդ մարդն է մահացել, որովհետև նրան չեն կարողացել հասցնել Երևան։ Ահա սրանք են իրական խնդիրները»,- ամփոփեց Սոֆյա Հովսեփյանը։
