Արցախն իր կարողականությամբ, ենթակառուցվածքներով ՀՀ առնվազն 2-3 մարզի պետենցիալ է ունեցել, «Մեկ տարի՝ առանց Արցախի» քննարկման ժամանակ այսօր հայտարարեց «Genesis Armenia» վերլուծաբանական կենտրոնի հիմնադիր Աբրահամ Գասպարյանը։
«Մասնագիտական հանրույթի հարցն է լուրջ վերլուծություններ կատարել Արցախում մնացած մոտ 100 միլիարդ դոլարի գույքի շուրջ։ Պարզից էլ պարզ է, որ ոչ նյութական արժեքները գնահատել հնարավոր չէ, բայց վիճակագիրները, տնտեսագետները շատ գործ ունեն անելու, որպեսզի քիչ թե շատ օբյեկտիվ թվի շուրջ լինի կոնսենսուս։ Առաջիկայում այդ թվերը պետք են գալու։
Վերջերս Միջազգային քրեական դատարանի առաջին դատախազ Լուիս Մորենո Օկամպոն էր Հայաստանում, և նա ակնկալում է, որ հայկական կողմը կունենա փաստաթղթային համապատասխան բազա, որով էլ կներկայանա միջազգային ատյաններում»,- նշեց Աբրահամ Գասպարյանը։
Բանախոսը միաժամանակ ափսոսանք հայտնեց, որ Հայաստանում առայժմ լրջորեն չեն արձագանքել Օկամպոյի դիտարկումներին, և այս քննարկումը լավ հնարավորություն է իրենց ստեղծած բազայի հիման վրա աշխատանքներ սկսել։
