Ադամ Շիֆի հեղինակած բանաձևը՝ ձայն բարբառո հանապատի. միջազգայնագետ
Չեմ կարծում, որ ԱՄՆ Դեմոկրատ կոնգրեսական Ադամ Շիֆի՝ Միացյալ Նահանգների Կոնգրեսի Ներկայացուցիչների պալատ ներկայացրած բանաձևը գործնական որևէ օգուտ ունենա Բաքվում պահվող հայ գերիների ազատ արձակման հարցում, Azg.am-ի թղթակցի հետ զրույցում կարծիք հայտնեց միջազգայնագետ Գրիգոր Բալասանյանը։
Հիշեցնենք, որ Ամերիկայի Հայ Դատի հանձնախմբի (ANCA) հաղորդմամբ՝ հայամետ կոնգրեսականը բանաձև է ներկայացրել ԱՄՆ Կոնգրեսի Ներկայացուցիչների պալատ, որով պահանջում է Բաքվից անհապաղ ազատ արձակել հայ ռազմագերիներին, գերեվարված քաղաքացիական անձանց և քաղբանտարկյալներին, այդ թվում՝ Արցախի կառավարության պաշտոնյաներին, որոնք ապօրինաբար կալանավորվել են անցյալ ամիս՝ Ադրբեջանի էթնիկ զտումների ժամանակ։
«Ամերիկահայ համայնքը վերջին շրջանում դժգոհություն է հայտնում Ադամ Շիֆի գործունեությունից՝ նշելով, որ նա միայն անունով է հայամետ կոնգրեսական, և որ վերջինիս գործունեությունից հայ համայնքը ոչինչ չի շահում, հայանպաստ որևէ հարց չի լուծվում։
Իմ կարծիքով՝ Ադամ Շիֆն ԱՄՆ Կոնգրեսի Ներկայացուցիչների պալատ նման բանաձև ներկայացնում է զուտ ներքին լսարանի՝ տեղի հայ համայնքի համար՝ հաշվի առնելով, որ առջևում ընտրություններ են։
Նա իր այս քայլով ցանկանում է հերթական անգամ հիշեցնել, որ իբր ինքը շատ մեծ աշխատանք է տանում և արժանի է գալիք ընտրություններին կրկին ստանալու ազգությամբ հայ ԱՄՆ քաղաքացիների քվեները»,- ասաց միջազգայնագետը։
Ինչ վերաբերում է հայ ռազմագերիների վերադարձի մասին բանաձևի արտաքին ազդեցությանը, ըստ Գրիգոր Բալասանյանի՝ վաղուց ժամանակն է հասկանալու, որ Ադրբեջանը թքած ունի նմանօրինակ բանաձևերի և հայտարարությունների վրա։
«Ադրբեջանն անգամ չկատարեց ՄԱԿ-ի արդարադատության միջազգային դատարանի որոշումը՝ ապաշրջափակելու Լաչինի միջանցքը։ Հիմա բնական է, որ ԱՄՆ կոնգրեսականի կոչն այդ երկրի համար՝ ձայն բարբառո հանապատի։ Դրա համար չեմ կարծում, որ Ադամ Շիֆի նախաձեռնությունը կարող է որևիցե օգուտ ունենալ»,- ամփոփեց միջազգայնագետը։
Հիշեցնենք, որ ԱՄՆ կոնգրեսականի ներկայացրած բանաձևը, մասնավորապես, կոչ է անում Բայդենի վարչակազմին պատժամիջոցներ կիրառել Ադրբեջանի պետական պաշտոնյաների նկատմամբ, որոնք պատասխանատու են հայ ռազմագերիների անօրինական կալանավորման, խոշտանգումների և արտադատական սպանությունների համար: Այն կրկնում է նաև Ադրբեջանին ԱՄՆ ռազմական և անվտանգության աջակցության վերաբերյալ 907-րդ հոդվածի կիրառումը սահմանափակելու մասին Կոնգրեսի կոչերը։
