Կարծում եմ՝ բոլորովին անհրաժեշտ չէ, որ Արցախը բարձրաձայնի, թե Հայաստանն ինչ կարծիք ունի Ադրբեջանի առաջարկած ինտեգրացիայի մասին, Azg.am-ի թղթակցի հետ զրույցում ասաց քաղաքագետ Ռոբերտ Ղևոնդյանը՝ անդրադառնալով հարցին՝ արդյոք կասկածելի չէ, որ ԱՀ նախագահը մինչև հիմա չի բարձրաձայնում՝ ինչ կարծիք ունի Փաշինյանը Ադրբեջանի պահանջի առնչությամբ՝ կամ Ադրբեջանի հետ Արցախի ինտեգրացիա, կամ նոր կոշտ քայլեր։
«Ադրբեջանի առաջարկած ինտեգրացիայի մասով բավարար է հենց միայն Արցախի կարծիքը, որովհետև Հայաստանն Արցախի խնդրում ունի իր գերակայությունները և բազմիցս հայտարարել է, թե ինչպես և ինչ քայլերով է պատկերացնում ԼՂ խնդրի լուծումը։ Հայաստանի կարծիքն Արցախի հարցում այն է, որ ԼՂ խնդիրը պետք է լուծվի Ադրբեջան-Արցախ ուղիղ կոմունիկացիաների միջոցով՝ միջազգային հանրության և այդ միջազգային հանրության մաս կազմող Հայաստանի Հանրապետության միջնորդությամբ։
Թե դրանից հետո ինչ կխոսվի, ինչ կորոշվի, և հարցն ինչպես կլուծվի, կերևա ընթացքից հետո։ Բայց դեռևս նույնիսկ ընթացքի հետ կապված համաձայնություն չկա՝ Հայաստանի և Ադրբեջանի, Ադրբեջանի և Արցախի միջև»,- ասաց մեր զրուցակիցը։
Քաղաքագետի խոսքով՝ այն, որ Ադրբեջանն Արցախին ինտեգրացիա է առաջարկել կամ ինտեգրացիան մերժելու դեպքում կոշտ միջոցներ խոստացել, բոլորովին զարմանալի չէ։ Ըստ Ղևոնդյանի՝ ակնհայտ է, որ Ադրբեջանն ամեն կերպ առաջ է տանում սեփական օրակարգը, Հայաստանն ու Արցախը ևս պետք է առաջ մղեն իրենց շահերը։
«Ես չեմ ասում, որ Արցախը պետք է խոսի Ադրբեջանին չինտեգրվելու մասին։ Արցախը պետք է խոսի իր խնդիրների մասին, փորձի քննարկել հումանիտար հարցերը։ Օրինակ՝ կարող է տարիներ շարունակ իր անհամաձայնությունը հայտնել ինտեգրման առնչությամբ՝ տարբեր ձևաչափերով և խուսանավումներով։ Դիվանագիտությունը ճկուն գործիք է»,- ասաց Ղևոնդյանը։
Հիշեցնենք, որ ԱՀ նախագահ Արայիկ Հարությունյանը մարտի 6-ին Անվտանգության խորհրդի ընդլայնված նիստ էր հրավիրել՝ հայտարարելով, որ ադրբեջանական կողմը փոխանցել է՝ կամ Արցախն ընդունում է ինտեգրացիոն քաղաքականությունը, կամ առկա խնդիրներին որևէ լուծում չի լինելու, հակառակը՝ լինելու են ավելի կոշտ և կտրուկ քայլեր:
