Այս օրերին փորձում ենք կրկնել բողոքի այն գործողությունները, որոնց դեմ պայքարելու ձևերին ՀՀ գործող իշխանությունները լավագույնս են տիրապետում։ Բայց խնդիրը պետք է ոչ թե ճանապարհ փակելը լինի, այլ նոր՝ ստեղծագործ միջոցներով բողոքի ձայն բարձրացնելը։ Azg.am-ի թղթակցի հետ զրույցում նման տեսակետ հայտնեց վերլուծաբան Թևան Պողոսյանը՝ անդրադառնալով Տավուշում, Երևանում և միջպետական ճանապարհներին բողոքի գործողություններին։
«Այն, ինչ Տավուշում է կատարվում, միայն Տավուշի՞ն է վերաբերում. իհարկե ո՛չ։ Կատարվողը վերաբերում է ամբողջ Հայաստանին և հայ ազգին։ Որտեղ մարդիկ զգում են, որ լուծելու խնդիր ունեն, պետք է բողոքի ձայն բարձրացնեն, բայց գաղափարը պետք է լինի այն, որ դա հնի կրկնություն չլինի։
Իմ պատկերացմամբ մենք այլ գործընթացի մեջ պետք է լինենք։ Կորցնելով Արցախը՝ մենք արդեն շրջել ենք հայոց պետականության վերջին էջը, իսկ հիմա արդեն թշնամին ամեն օր նոր պահանջներ է ներկայացնում։ Խոսքը միայն Տավուշի մասին չէ. պետք է հասկանանք, որ պետականություն ենք կորցնում։ Մարդիկ տարբեր գործիքակազմեր պետք է գործի դնեն, ոչ միայն ճանապարհներ փակեն, այլապես տեսնում ենք, թե ինչպես են ուժ կիրառում, մարդկանց ձերբակալում»,- ասաց Թևան Պողոսյանը։
Նրա խոսքով՝ եթե իշխանությունները որոշել են, որ ճնշելու են բողոքի գործողությունները և բացելու են փակ ճանապարհներ, ապա չեն նայելու, թեքանի մարդ է ճանապարհ փակել։
«Պետք է պայքարի այնպիսի միջոցներ գործի դնել, որ այդ նույն ոստիկաններն ասեն՝ «Լավ, բա մեր երեխաները որտե՞ղ են ապրելու, մենք ո՞նց ենք ապրելու»»,- նշեց Թևան Պողոսյանը։
Ինչ վերաբերում է հոգևոր դասի ներկայացուցիչների՝ տավուշցիների բողոքին սատարելուն, վերլուծաբանը նկատեց՝ քանի որ քաղաքական դաշտն ամայացել է, էական դերակատարություն է ստացել հոգևորականությունը։
Ըստ մեր զրուցակցի՝ կաթոլիկ եկեղեցին ներազդեցություն ունի ազդեցության գոտիներում, և բնական է, որ Հայաստանում էլ պետք է ազդեցություն ունենա Հայ Առաքելական եկեղեցին։
«Մի մարդ Բագրատ Սրբազանի մասին ինձ աում էր՝ «Գոնե մի անգամ տեսած լինեի, որ նա նախկինների ժամանակ պայքարել է»։ Ես էլ իրեն ասում եմ՝ «Իսկ Էլեկտրիկ Երևա՞նը, կարող եմ համացանցից հազարավոր լուսանկարներ գտնել, որտեղ Բագրատ Սրբազանը կանգնած է ցուցարարների և ոստիկանների միջև»։
Այնպես որ, գործողների օրակարգն է հոգևորականներին քննարկելը։ Հոգևորականներն էլ մարդիկ են, և ես ուրախ եմ, որ այսօր նրանք ժողովրդի կողքին են։ Հոգևորականը չի կարող իր հոտի հետ չլինել»,- ամփոփեց Թևան Պողոսյանը։
Հիշեցնենք, որ ի աջակցություն տավուշցիերի՝ այսօր Երևանում և միջպետական ավտոճանապարհներին բողոքի ակցիաներ են։ Քաղաքացիներն անհնազանդության գործողություններ են իրականացնում՝ կաթվածահար անելով գլխավոր մայրուղիները։
